وزیر اعظم شہباز شریف کی زیر صدارت وفاقی کابینہ کا اجلاس آج ہوگا

وفاقی دارالحکومت اسلام آباد میں وزیر اعظم شہباز شریف کی زیر صدارت وفاقی کابینہ کا اجلاس آج ہوگا جس میں ملک کو درپیش معاشی و سیاسی چیلنجز سمیت دیگر اہم امور پر تبادلۂ خیال کیا جائے گا۔

تفصیلات کے مطابق وزیر اعظم شہباز شریف نے گزشتہ روز وفاقی کابینہ کی تشکیل کے ساتھ ہی اجلاس بدھ کے روز طلب کیا تھا۔ آج صبح 10 بجے شروع ہونے والے وفاقی کابینہ اجلاس میں ملک کی سیاسی و معاشی صورتحال پر گفتگو ہوگی۔ مہنگائی، عالمی صورتحال اور سیاسی مسائل بھی زیر غور آئیں گے۔

یہ بھی پڑھیں:

سویڈن میں قرآنِ پاک کی بے حرمتی، وزیر اعظم  کا اظہارِ تشویش

رواں ماہ کی ابتدا میں سابق وزیر اعظم عمران خان کی حکومت ختم ہونے کے بعد پیپلز پارٹی، ن لیگ اور جمعیت علمائے اسلام سمیت دیگر سیاسی جماعتوں کے اراکین پر مشتمل وفاقی کابینہ اجلاس میں ملک کو درپیش اہم مسائل، دفاع، قومی سلامتی اور دہشت گردی سمیت دیگر چیلنجز بھی زیر غور آئیں گے۔

قبل ازیں وزیر اعظم شہباز شریف واضح کرچکے ہیں کہ موجودہ حکومت کے پاس بہت کم وقت ہے، اس لیے عوامی فلاح وبہبود کے منصوبوں پر جلد از جلد کام کرنے پر توجہ دی جائے گی۔ ملک کو درپیش معاشی چیلنجز بالخصوص مہنگائی پر قابو پانا وزیر اعظم کی اولین ترجیحات میں شامل ہے۔

اس سے قبل 2018کے عام انتخابات میں عوام کے ووٹوں سے برسرِ اقتدار آنے والی تحریکِ انصاف کی حکومت معاشی چیلنجز بالخصوص مہنگائی پرقابو پانے میں ناکام رہی۔ شہباز شریف حکومت کیلئے مہنگائی سب سے بڑ ا چیلنج ہے جس سے نمٹنے کیلئے وفاقی کابینہ کے اراکین آج تفصیلی غوروخوض کریں گے۔