نگراں وزیر اعظم کی تقرری کیلئے عمران خان اور شہباز شریف میں مشاورت

اسلام آباد: وزیر اعظم اور اپوزیشن لیڈر کے مابین نگراں وزیر اعظم کی تقرری کیلئے مشاورت کا عمل شروع کردیا گیا۔ عمران خان شہباز شریف کو خط آج لکھیں گے۔

تفصیلات کے مطابق عمران خان نگراں وزیر اعظم کی تقرری تک بطور وزیر اعظم کام جاری رکھیں گے۔ 52 رکنی وفاقی کابینہ تحلیل ہوچکی ہے۔ 25 وفاقی وزراء، 4 وزرائے مملکت، 4 مشیر اور 19 معاونینِ خصوصی بھی عہدوں سے محروم ہوگئے۔

یہ بھی پڑھیں:

آپ کا وزیر اعظم آپ کیساتھ، عمران خان فون پر عوام سے بات آج کریں گے

آئینِ پاکستان کے مطابق صدرِ مملکت ڈاکٹر عارف علوی سبکدوش ہونے والے وزیر اعظم اور اپوزیشن لیڈر کی مشاورت سے نگراں وزیر اعظم کا تقرر عمل میں لائیں گے۔ کسی نام پر اتفاق نہ ہونے کی صورت میں اسپیکر قومی اسمبلی فوری کمیٹی بنائیں گے۔

سبکدوش ہونے والے وزیر اعظم عمران خان اور اپوزیشن لیڈر شہباز شریف 3 نام کمیٹی کو بھجوائیں گے جبکہ8 رکنی کمیٹی میں سبکدوش ہونے والے اراکینِ اسمبلی میں سے 4 اپوزیشن کے اور 4 حکومتی اراکین شامل ہوں گے۔

کمیٹی ممبران میں بھی نگراں وزیر اعظم کے نام پر اتفاق نہ ہونے کی صورت میں معاملہ الیکشن کمیشن کو بھجوایا جائے گا۔ نگراں وزیر اعظم کی تقرری تک سبکدوش ہونے والے وزیر اعظم عمران خان اپنے عہدے پر برقرار رہیں گے۔

قبل ازیں وزیر اعظم کی زیر صدارت بنی گالہ میں پی ٹی آئی کی سیاسی کمیٹی کا اجلاس ہوا جس میں نگراں وزیر اعظم کیلئے ناموں پر غور کیا گیا۔ عمران خان کی جانب سے نگراں وزیر اعظم کے مجوزہ نام آج ہی شہباز شریف کو بھجوائے جانے کا امکان ہے۔