گوگل نیوز پر ہمیں فالو کریںسپریم کورٹ آف پاکستان نے شہرِ قائد سے تمام تر غیر قانونی بل بورڈز فوری طور پر ہٹانے کا حکم دیتے ہوئے کراچی پولیس کو متعلقہ ملزمان کی گرفتاری کیلئے 30 منٹ کی مہلت دی ہے۔
عدالتِ عظمیٰ (سپریم کورٹ) کراچی رجسٹری میں اہم مقدمات کی سماعت چیف جسٹس کی سربراہی میں ججز کے 3 رکنی بینچ نے کی۔ بل بورڈز کیس کی سماعت کے دوران کمشنر کراچی افتخار شالوانی اور متعلقہ حکام سے مختلف سوالات کیے گئے۔
دورانِ سماعت ریمارکس دیتے ہوئے چیف جسٹس نے کمشنر کراچی سے کہا کہ شہرِ قائد میں بل بورڈز جگہ جگہ موجود ہیں، شارعِ فیصل پر اشتہاروں سے بھری ہوئی عمارتوں کے ساتھ لوگ کیسے جی رہے ہیں؟ کمشنر کراچی نے عدالت کو آگاہ کیا کہ بہت سے ادارے اور لوگ ہیں جو سرکاری جائیداد سے ناجائز فوائد حاصل کرتے ہیں۔
چیف جسٹس نے کہا کہ آپ ذمہ دار افسران کو فارغ کرنے کا اختیار رکھتے ہیں، بلڈنگ پلان پر عملدرآمد حکومت کا کام ہے تاہم یہاں حکومت نام کی کوئی چیز نظر نہیں آتی۔ پیسے والے ہر کام کرلیتے ہیں۔ اِس موقعے پر ایڈووکیٹ جنرل سلمان طالب الدین نے کہا کہ مقدمہ درج ہوگیا ہے۔ کارروائی کی جائے گی۔
بعد ازاں عدالت نے شہرِ قائد میں موجود تمام تر غیر قانونی بل بورڈز ہٹانے کا حکم دے دیا اور ایس ایس پی ساؤتھ کو متعلقہ ملزمان کی گرفتاری کیلئے 30 منٹ کا وقت دیا گیا۔
یاد رہے کہ اِس سے قبل چیف جسٹس آف پاکستان جسٹس گلزار احمد نے کہا کہ کراچی سے ہر کوئی اپنے حصے کی بالٹی بھر کر لے جاتا ہے ، سب کے سب مافیا بنے ہوئے ہیں،کراچی کو ہر کوئی تباہ کررہا ہے ۔
بل بورڈ گرنے کے معاملے پر ازخود نوٹس کیس کی سماعت کے موقع پر سپریم کورٹ کراچی رجسٹری میں میئر کراچی وسیم اختر، کمشنر کراچی افتخار شالوانی ، ایڈووکیٹ جنرل اور دیگر اعلیٰ حکام عدالت میں پیش ہوئے۔
مزید پڑھیں: کراچی کو تباہ کرنے کیلئے سب مافیا بنے ہوئے ہیں۔چیف جسٹس
