محکمہ تعلیم پنجاب کا صوبے کے 34 اضلاع میں 31 مئی سے کالجز کھولنے کا فیصلہ

لاہور: محکمہ تعلیم پنجاب نے 36 میں سے 34 اضلاع کے کالجز اور تمام سرکاری اسکولز 31 مئی سے کھولنے کے احکامات جاری کردیئے ہیں۔

تفصیلات کے مطابق محکمہ ہائر ایجوکیشن نے کالجز کھولنے کا نوٹی فکیشن جاری کردیا ہے۔ نوٹی فکیشن کے مطابق کا اطلاق تمام سرکاری اور نجی کالجز پر ہوگا۔

محکمہ ہائر ایجوکیشن کے نوٹیفکیشن کے مطابق خانیوال اور رحیم یار خان کے اضلاع میں تاحکم ثانی کالجز بند رہیں گے، بقیہ تمام اضلاع میں پیر 31 مئی سے کالجز کورونا ایس او پیز کے تحت کھل جائیں گے۔

نوٹیفکیشن میں 5 جون تک تمام اساتذہ اور ملازمین کو ویکسین لگوانے کی بھی ہدایات جاری کی گئی ہے۔

واضح رہے کہ نیشنل کمانڈ اینڈ آپریشن سینٹر (این سی او سی) نے  وفاقی اور صوبائی حکومتوں کے نام مراسلہ جاری کیا تھا جس میں کورونا وائرس سے شدید متاثرہ اضلاع میں تعلیمی ادارے نہ کھولنے کی ہدایت کی گئی تھی۔

مراسلے میں کہا گیا تھا کہ کورونا کے شدید متاثرہ اضلاع میں 6 جون تک تعلیمی ادارے نہ کھولے جائیں۔ صوبے متعلقہ حکام کو تعلیمی اداروں سے متعلق احکامات جاری کریں۔