تحریکِ انصاف مہنگائی کے خلاف ملک گیر احتجاج آج کرے گی

اسلام آباد: پاکستان تحریکِ انصاف کی جانب سے ملک بھر میں مہنگائی کے خلاف احتجاج آج کیا جائے گا جس میں پی ٹی آئی رہنماؤں اور کارکنان کے ساتھ ساتھ عوام کی بڑی تعداد کی شرکت متوقع ہے۔

تفصیلات کے مطابق ملک بھر میں مہنگائی عروج پر ہے۔ کراچی میں شاہراہِ قائدین جبکہ لاہور میں لبرٹی چوک پر بھرپور احتجاج کیا جائے گا۔ وفاقی دارالحکومت اسلام آباد میں ایف 9 پارک کو مظاہرے کا مرکز بنایا گیا ہے۔

یہ بھی پڑھیں:

لٹیروں نے اپنی تجوریوں کیلئے ملک گروی رکھ دیا، عمران خان

چیئرمین پی ٹی آئی اور سابق وزیر اعظم عمران خان کی ہدایت پر راولپنڈی میں کمرشل مارکیٹ، پشاور میں ہشت نگر، ملتان میں چوک شاہ عباس جبکہ فیصل آباد میں گھنٹہ گھر پر کمر توڑ مہنگائی کے خلاف احتجاج کیا جائے گا۔ 

خیال رہے کہ اس سے قبل سابق وزیر اعظم عمران خان نے کہا کہ لٹیروں نے اپنی تجوریاں بچانے کیلئے عوام پر مہنگائی کاعذاب نازل کردیا۔ اپنی جائیدادیں ملک کے باہر رکھنے والوں کو پاکستان کے مستقبل کی کوئی فکر نہیں۔

تحریکِ انصاف کے چیئرمین عمران خان نے کہا کہ عوام پر دن دہاڑے ظلم برداشت نہیں کریں گے۔ گزشتہ دو ماہ میں غیر ملکی سازش کا ہر کردار سامنے آگیا۔ تیاری کے بغیر حکومت پر قابض لشکر قوم کا مستقبل داؤ پر لگا رہا ہے۔