وزیر اعظم کیخلاف تحریکِ عدم اعتماد، پی ٹی آئی کا اجتماعی استعفوں پرغور

اسلام آباد: اپوزیشن کی جانب سے وزیر اعظم کے خلاف تحریکِ عدم اعتماد پر تشویشناک پیشرفت سامنے آنے کے بعد تحریکِ انصاف نے اجتماعی استعفوں کے آپشن پر غور و خوض اور مشاورت شروع کردی ہے۔

تفصیلات کے مطابق وزیر اعظم عمران خان تحریکِ عدم اعتماد کی ممکنہ کامیابی کے بعد دیگر آپشنز پر غور کر رہے ہیں۔ اگر حکومت عدم اعتماد کے معاملے سے نمٹنے میں ناکام رہی تو اسمبلیوں سے استعفے دینے کا کارڈ استعمال کیا جاسکتا ہے۔

یہ بھ پڑھیں:

رمضان المبارک کا چاند دیکھنے کیلئے رویتِ ہلال کمیٹی کا اجلاس آج ہوگا

تحریکِ انصاف کے سینئر مرکزی رہنماؤں نے وزیر اعظم کو تجویز دی ہے کہ بدعنوان حکمرانوں کے ساتھ اپوزیشن کا کردار نبھانے سے پی ٹی آئی اراکین اور اتحادیوں کا اجتماعی طور پر استعفے دے کر ایوانِ اقتدار چھوڑ دینا بہتر ہوگا۔

تکنیکی اعتبار سے اگر پی ٹی آئی اور اتحادی ایوانِ اقتدار چھوڑ دیں تو نئی حکومت سیاسی بحران کا شکار ہوجائے گی۔ وفاق کے علاوہ پنجاب اور خیبر پختونخوا کے اراکینِ اسمبلی بھی اپنی نشستوں سے مستعفی ہوسکتے ہیں۔

نئی حکومت کیلئے بھاری تعداد میں نشستوں پر ضمنی الیکشن کا انعقاد مشکل ثابت ہوگا۔ وزیر اعظم فوری طور پر عام انتخابات کی طرف جانے کے آپشن پر غور کر رہے ہیں۔ واضح رہے کہ وفاق میں 155 جبکہ خیبر پختونخوا میں 145نشستیں پی ٹی آئی کی ہیں۔