کراچی میں پی ٹی آئی کا نمائش چورنگی دھرنا ختم، کارکنان گھر پہنچ گئے

کراچی: چیئرمین تحریکِ انصاف کی جانب سے حکومت کو 6 روز کی ڈیڈ لائن ملنے کے بعد پی ٹی آئی کارکنان گھر پہنچ گئے، نمائش چورنگی پر تحریکِ انصاف کا حکومت مخالف دھرنا ختم کردیا گیا ہے۔

تفصیلات کے مطابق تحریکِ انصاف سندھ کے صدر اور سابق وزیرِ بحری امور علی زیدی اور سابق اپوزیشن لیڈر سندھ اسمبلی فردوس شمیم نقوی، سابق صدر پی ٹی آئی کراچی خرم شیر زمان، رکنِ اسمبلی خرم شیر زمان، بلال غفار اور عباس جعفری دھرنے میں شریک ہوئے اور پی ٹی آئی کارکنان کی قیادت کی۔

یہ بھی پڑھیں:

نمائش چورنگی پر احتجاج، صورتحال کشیدہ، 2افراد جاں بحق

بدھ کے روز نمائش چورنگی پر بڑے جوش و خروش سے دھرنا دیا گیا۔ پی ٹی آئی ویمن ونگ کی خواتین نے بڑی تعداد میں دھرنے میں اپنی شرکت یقینی بنائی، تاہم دھرنا آج صبح 8 بجے کے لگ بھگ اختتام پذیر ہوا۔ صدر پی ٹی آئی سندھ علی زیدی نے کہا کہ عمران خان کا دھرنا قوم کے مستقبل کی جنگ ہے۔ کوئی یہاں سے نہ ہلے۔

کارکنان کے جوش و خروش کو بڑھاتے ہوئے علی زیدی کا کہنا تھا کہ ہم سابق وزیر اعظم عمران خان کی تقریر اسکرین پر لائیو دکھائیں گے۔ اگر عمران خان کہتے ہیں کہ گھر چلے جاؤ تو جائیں، بصورتِ دیگر سب یہیں رہیں گے۔ رکنِ سندھ اسمبلی فردوس شمیم نقوی نے بھی کارکنان کے جوش و خروش کو خوب بڑھایا۔

سابق قائدِ حزبِ اختلاف سندھ اسمبلی فردوس شمیم نقوی نے پوچھا کہ کوئی گھر کو تو نہیں جائے گا؟ سب نے ہاتھ اٹھا کر یقین دلایا کہ جب تک عمران خان نہیں کہیں گے، گھر نہیں جانا، جس پر پی ٹی آئی رہنماؤں نے مسرت کا اظہار کیا۔ رات کے وقت کارکنان کی آؤ بھگت کیلئے پانی، رول پراٹھا، بریانی اور پلاؤ بھی فراہم کیا گیا۔

بعد ازاں صدر پی ٹی آئی کراچی و رکنِ سندھ اسمبلی بلال غفار نے شرکائے دھرنا کا شکریہ ادا کیا اور چیئرمین تحریکِ انصاف عمران خان کی جانب سے دھرنا ختم کرنے اور 6 روز تک کی ڈیڈ لائن دینے پر دھرنا ختم کرنے کا اعلان کردیا۔ کارکنان ہنسی خوشی گھروں کو لوٹ گئے جس کے بعد ٹریفک کی آمدورفت بھی بحال ہوگئی۔