پاکستان اسٹاک مارکیٹ میں 206پوائنٹس کی مندی

کراچی: پاکستان اسٹاک مارکیٹ میں آج مسلسل دوسرے روز مندی کا رجحان غالب آگیا، اسٹاک ایکسچینج 206 پوائنٹس کی مندی کے ساتھ منفی رجحان کی زد پر رہی۔ سرمایہ کار کاروباری اوقات کے دوران مثبت رجحان کا مظاہرہ نہ کرسکے۔

تفصیلات کے مطابق آج کاروباری ہفتے کے دوسرے روز اسٹاک مارکیٹ میں ابتدائی اوقات کے دوران مثبت رجحان غالب نظر آیا اور کے ایس ای 100انڈیکس 46 ہزار 746 اعشاریہ 27 پوائنٹس کی بلند ترین سطح پر جا پہنچا جسے 6   ماہ کی بلند ترین سطح قرار دیا جارہا ہے تاہم کچھ ہی وقت بعد مارکیٹ میں مندی کا رجحان غالب آگیا۔

یہ بھی پڑھیں:

موجودہ حکومت توانائی بحران حل کرنے کی صلاحیت رکھتی ہے، مفتاح اسماعیل

زرِ مبادلہ کی شرح میں غیر یقینی صورتحال کے پیش نظر کچھ وقت کی تجارت میں تیزی سے اتار چڑھاؤ نظر آیا۔ آج روپے کی قیمت ڈالر کے مقابلے میں 1.9 روپے تک گرتی نظر آئی جس نے سرمایہ کاروں کی حوصلہ شکنی کی۔ کے ایس ای 100 انڈیکس میں 206 اعشاریہ 23 پوائنٹس کی کمی دیکھی گئی۔

کے ایس ای 100 انڈیکس 46 ہزار 333 اعشاریہ 36 پوائنٹس کی سطح پر آگیا۔ حصص کا کل حجم 11 کروڑ 46 لاکھ تھا جس کی مالیت 6 اعشاریہ 8 ارب روپے تھی۔ کے ایم آئی 30 انڈیکس میں 423 اعشاریہ 82 پوائنٹس کی کمی ہوئی جو 75 ہزار 869 اعشاریہ 47 پوائنٹس پر بند ہوا۔ آل شیئر انڈیکس میں بھی 166 اعشاریہ 94 پوائنٹس کی کمی ہوئی۔

آل شیئر انڈیکس 31 ہزار 437 اعشاریہ 91 پوائنٹس پر بند ہوا۔ اسٹاک مارکیٹ میں آج کل 22 کروڑ 85 لاکھ 56 ہزار حصص کا کاروبار ہوا۔ کے ایس ای 100 انڈیکس میں تجارت کرنے والی 95 کمپنیوں میں سے 24 کے حصص کے بھاؤ میں اضافہ، 66 کے بھاؤ میں کمی جبکہ 5 کے بھاؤ میں استحکام ریکارڈ کیا گیا۔