توانائی کا شعبہ ملکی معیشت کی ترقی میں کلیدی اہمیت کا حامل ہے، وزیراعظم

اسلام آباد: وزیراعظم عمران خان کا کہنا ہے کہ توانائی کا شعبہ ملکی معیشت کی ترقی میں کلیدی اہمیت کا حامل ہے،حکومت کی یہ کوشش ہے کہ بجلی کی قیمتوں میں استحکام کو یقینی بنایا جائے۔

وزیر اعظم عمران خان نے بجلی کی قیمتوں میں ممکنہ کمی سے متعلق اجلاس کی صدارت کی جس میں اسد عمر،عمر ایوب، علی حیدر زیدی، مشیر خزانہ عبدالحفیظ شیخ، معاون خصوصی ندیم بابر اور متعلقہ وفاقی سیکرٹریز و دیگر سینئر افسران نے شرکت کی۔

اجلاس میں بجلی کی قیمتوں میں ممکنہ کمی لانے سے متعلق تجاویز پر غور کیا گیا جب کہ وزیراعظم کا اجلاس سے خطاب کرتے ہوئے کہنا تھا کہ توانائی کا شعبہ ملکی معیشت کی ترقی میں کلیدی اہمیت کا حامل ہے۔

وزیراعظم عمران خان نے کہا کہ صارفین اور صنعتوں کو مناسب قیمت پر بجلی کی فراہمی، توانائی کے شعبے میں اصلاحات اور اس میں ہونے والے نقصانات پر قابو پانا حکومت کی اولین ترجیح ہے۔

انہوں نے کہا کہ ماضی کی حکومتوں کی جانب سے کیے جانے والے معاہدوں، بر وقت انتظامی اصلاحات کو پس پشت ڈالے جانے اور رسیل و تقسیم کے شعبے میں ہونے والے نقصانات کو نظر انداز کرنے سے توانائی کے شعبے میں آج مختلف چیلنجز کا سامنا ہے۔

وزیر اعظم نے کہا کہ ماضی کی حکومتوں کی کوتاہیوں کا سارا بوجھ عوام کو برداشت کرنا پڑ رہا ہے، حکومت ایک سے 300 یونٹس تک استعمال کرنے والے صارفین اور کمزور طبقے کو ممکنہ حد تک ریلیف فراہم کر رہی ہے۔

ان کا کہنا تھا کہ حکومت کی یہ کوشش ہے کہ بجلی کی قیمتوں میں استحکام کو یقینی بنایا جائے، عوام کی مشکلات کا بخوبی اندازہ ہے،جہاں تک ممکن ہو عوام کو ریلیف فراہم کرنے کی کوشش کررہے ہیں۔