جامعہ العربیہ شفیق الاسلام گلشن اقبال تیرہ ڈی میں شعبہ حفظ، ناظرہ اور کتب کے نتائج کے موقع پر تقریب کا اہتمام کیا گیا۔

تقریب سے خطاب کرتے ہوئے مہتمم جامعہ شیخ الحدیث علامہ احمد علی مدنی نے توحید پر درس دیا اور  کہا کہ اللہ تعالی کی ذات وحدہ لاشریک ہے۔ حضرت محمدؐ آخری نبی و رسول ہیں۔ قرآن آخری کتاب ہے،جس کی حفاظت کا ذمہ رب کائنات نے خود لیا ہے۔

انہوں نے کہا کہ حفاظ کرام سے قرآن مجید کی حفاظت کا عظیم کام لیا جارہا ہے، جبکہ دیگر آسمانی کتب توریت، زبور اور انجیل کو ان کے پیروکاروں نے تبدیل کرکے رکھ دیا۔ انہوں نے طلبہ کو نصیحت کرتے ہوئے کہا کہ وہ اپنی تعلیم پر خصوصی توجہ دیں۔ قرآن کی تعلیمات میں تمام علوم پوشیدہ ہیں۔

یہ بھی پڑھیں:

اس موقع پر شعبہ کتب میں طالبعلم حسن جان ولد عبدالخالق نے اول، جبکہ درجہ حفظ میں کامران بن بنارس، محمد رفیع بن مفتی غلام مرتضی اور نقیب الرحمن بن فضل الرحمن نے بالترتیب پہلی، دوسری ، تیسری جب کہ شعبہ ناظرہ و اسکول میں انور علی بن علی حسن اول ، فیروز بن فاروق و عبداللہ بن ارشادہ دوم اور شایان بن اسلم نے تیسری پوزیشن حاصل کی۔

تمام پوزیشن حاصل کرنے والے طلبہ میں موسم کی مناسبت سے خشک میوہ جات انعام میں دیے گئے۔ تقریب میں مفتی افضل محمد، مولانا خالد، مولانا زبیر عثمان، مولانا مطیع اللہ، مولانا حنیف، مولاناحسان، مولانازبیر احمد، قاری مقصود، قاری عبدالرشید، قاری سعد اور قاری فاروق موجود تھے۔