وزیر اعظم عمران خان کا سوات کے بعد کرم میں بھی جلسے کا فیصلہ

سینیٹر فیصل جاوید کا کہنا ہے کہ وزیراعظم عمران خان سوات کے بعد اب کرم میں بھی جلسہ کریں گے۔

پاکستان تحریک انصاف سے تعلق رکھنے والے سینیٹر فیصل جاوید خان نے سماجی رابطے کی ویب سائٹ ’ٹوئٹر‘ پر جاری کردہ اپنے بیان میں کہا ہے کہ اب باری ہے کرم خیبر پختونخواہ کی، آیئے مل کر اپوزیشن کو اعتماد دلانے پر شکریہ بولیں۔

اور اب باری ہے کرم خیبرپختونخوا کی! آئیے مل کر اپوزیشن کو عدم اعتماد لانے پر شکریہ بولیں-منڈی بہاوالدین,میلسی, دیر٫حافظ آباد,سوات کے کامیاب عوامی جلسوں کے بعد کل وزیراعظم عمران خان عوامی رابطہ مہم کے تحت انشاءاللہ کرم میں جلسہ عام سے خطاب کریں گے- عوام کاوزیراعظم پر بھرپور اعتماد pic.twitter.com/SfdDYQLnHi

— Faisal Javed Khan (@FaisalJavedKhan) March 17, 2022

انہوں نے کہا کہ منڈی بہاوالدین ،میلسی، دیر،حافظ آباد،سوات کے کامیاب عوامی جلسوں کے بعد کل وزیراعظم عمران خان عوامی رابطہ مہم کے تحت انشاءاللہ کرم میں جلسہ عام سے خطاب کریں گے-

سینیٹر فیصل جاوید نے کہا کہ عوام کاوزیراعظم پر بھرپور اعتماد ہے۔

خیال رہے کہ وزیر اعظم کی جانب سے سوات جلسے کے دوران اپوزیشن پر تنقید کے نتیجے میں الیکشن کمیشن آف پاکستان نے سوات میں جلسے کا نوٹس لیتے ہوئے وزیر اعظم عمران خان کو کل طلب کر لیا ہے۔

یہ بھی پڑھیں: سوات میں جلسہ، الیکشن کمیشن نے وزیر اعظم کو کل طلب کر لیا

الیکشن کمیشن نے سوات میں جلسہ منعقعد کرنے پر پی ٹی آئی کے چیئرمین کو نوٹس جاری کردیا جس میں حکم دیا گیا ہے کہ وزیر اعظم 18مارچ کو ذاتی حیثیت میں یا قونصل کے ذریعے پیش ہوں۔

الیکشن کمیشن کے ڈسٹرکٹ مانیٹرنگ آفیسر کی جانب سے جاری کردہ نوٹیفکیشن میں کہا گیا ہے کہ تمام پبلک آفس ہولڈرز کو سوات میں جلسہ کرنے سے روکا گیا تھا۔ وزیر اعظم نے روکنے کے باوجود سوات میں جلسہ کیا۔

ڈسٹرکٹ مانیٹرنگ آفیسر، الیکشن کمیشن کا کہنا ہے کہ اگر وزیر اعظم 18مارچ کو پیش نہ ہوئے تو قانونی کارروائی بھی کی جائے گی۔ نوٹیفکیشن میں وزیر اعلیٰ خیبر پختونخوا محمود خان اور وزیر خارجہ شاہ محمود قریشی کو بھی نوٹس جاری کردیا۔

نوٹیفکیشن وفاقی وزیرِ مواصلات مراد سعید اور ڈاکٹر امجد علی سمیت خیبر پختونخوا کے صوبائی وزرا کو بھی جاری کیا گیا ہے۔ الیکشن کمیشن کا کہنا ہے کہ سوات کا جلسہ خلافِ قانون تھا جس پر جواب طلبی کی گئی ہے۔