اسلام آباد: وزیراعظم عمران خان، صدر مملکت عارف علوی سمیت دیگر سیاسی رہنماؤں سے کوئٹہ دھماکے شدید الفاظ میں مذمت کی ہے۔
وزیراعظم عمران خان نے کوئٹہ میں دھماکے میں قیمتی جانوں کے ضیاع پر گہرے دکھ اور افسوس کا اظہار کرتے ہوئے واقعےکی شدید مذمت کرتے ہوئے واقعہ کی رپورٹ طلب کر لی ،وزیراعظم نے زخمیوں کو بہترین طبی امداد کی فراہمی کی بھی ہدایت کی۔
صدر مملکت ڈاکٹر عارف علوی نے دھماکے کے شہدا کے بلندی درجات اور اہلخانہ کے لیے صبر جمیل کی دعا۔ صدر نے زخمیوں کی جلد صحتیابی کے لیے بھی دعا کی،صدر عارف علوی نے اپنے پیغام میں کہا کہ دہشت گرد ملک میں بدامنی پیدا کرنے کی مذموم کوششیں کر رہے ہیں،قوم ان ناپاک سازشوں کے خلاف متحد ہے۔
چیئرمین پیپلز پارٹی بلاول بھٹو زرداری نے بھی کوئٹہ دھماکے کی مذمت کی اور ڈی ایس پی امان اللہ اور دیگر کی شہادت پر افسوس کا اظہار کیا ، بلاول بھٹو نے کہا دہشت گردی میں ملوث منصوبہ سازوں کو قانون کی گرفت میں لایا جائے ۔
وزیراعلیٰ بلوچستان جام کمال نے بھی مسجد کے اندر بم دھماکے کی مذمت کرتے ہوئے واقعے کی رپورٹ طلب کرلی ہے، وزیراعلیٰ بلوچستان نے دہشت گردی کی بزدلانہ کارروائی میں قیمتی جانوں کے ضیاع پر دکھ اور افسوس کا اظہار کیا ہے ۔
اسپیکر اسد قیصر اور ڈپٹی سپیکر قومی اسمبلی قاسم سوری، چیئرمین سینیٹ صادق سنجرانی، ڈپٹی چیئرمین سینیٹ سلیم مانڈوی والا نے بھی دھماکے کی مذمت کرتے ہوئے کہا کہ دہشت گردی میں ملوث منصوبہ سازوں کو قانون کی گرفت میںلانے کا مطالبہ کیا ہے۔
معاون خصوصی اطلاعات فردوس عاشق اعوان نے کوئٹہ میں دھماکے کی شدید مذمت کرتے ہوئے کہا کہ اللہ کے گھر میں عبادت گزاروں پر حملہ کرنے والوں کا انسانیت سے کوئی تعلق نہیں ہے۔ پاکستان میں امن اور ترقی کے دشمن اپنے مذموم عزائم میں ناکام ونامراد ہوں گے۔
پاکستان مسلم لیگ (ن) کے صدر اور قائد حزب اختلاف شہباز شریف نے دھماکے کی مذمت کرتے ہوئے کہا ہے کہ اللہ تعالی کے حضور سجدہ ریز مسلمانوں کا خون بہانے والے دنیا اور آخرت میں قہر کا شکار ہوں گے۔ دہشت گردی کے واقعات پوری قوم کے لئے باعث رنج ہیں۔
ان کاکہنا تھا کہ ڈی ایس پی امان اللہ اور دیگر شہدا کے اہلخانہ سے تعزیت اور افسوس کرتے ہیں۔ متاثرہ خاندانوں کے غم میں برابر کے شریک ہیں۔ اللہ تعالی شہدا کے درجات کو بلند فرمائے اور پسماندگان کو صبرجمیل دے۔
گوگل نیوز پر ہمیں فالو کریں
