صدر اور وزیر اعظم کا دنیا بھر کے مزدوروں کو شاندار الفاظ میں خراجِ تحسین

اسلام آباد: صدرِ مملکت ڈاکٹر عارف علوی اور وزیر اعظم میاں شہباز شریف نے عالمی یومِ مزدور کے موقعے پر اپنے اپنے پیغامات میں پاکستان سمیت دُنیا بھر کے مزدوروں کو شاندار الفاظ میں خراجِ تحسین پیش کیا ہے۔

تفصیلات کے مطابق آج یومِ مئی کے موقعے پر اپنے پیغام میں صدرِ مملکت ڈاکٹر عارف علوی نے محنت کشوں کو خراجِ عقیدت پیش کرتے ہوئے کہا کہ کسی بھی ملک کی ترقی میں مزدوروں اور جفاکشوں کا کردار بنیادی اہمیت کا حامل ہوتا ہے۔

یہ بھی پڑھیں:

پاکستان سمیت دنیا بھر میں عالمی یومِ مزدورر آج منایا جارہا ہے

یومِ مزدور کے موقعے پر اپنے پیغام میں صدر عارف علوی نے کہا کہ افرادی قوت کو پیشہ ورانہ مہارت سے آراستہ کرنے کی ضرورت ہے۔ واضح رہے کہ آج یومِ مزدور کے موقعے پر ملک بھر میں تقریبات منعقد کی جارہی ہیں جن میں  مزدوروں کے مسائل اجاگر کیے جائیں گے۔

مزدوروں کے عالمی دن کے موقعے پر اپنے پیغام میں وزیر اعظم میاں شہباز شریف نے کہا کہ اسلام، آئینِ پاکستان اور عالمی معیارات کے تحت مزدوروں کے حالات کو بہتر بنائیں گے۔ عالمی یومِ مزدور پر پاکستان اور دنیا بھر کے محنت کشوں کو مبارکباد دیتا ہوں۔

عالمی دن پر پیغام میں وزیر اعظم نے کہا  کہ محنت کشوں کی ترقی کے بغیر دنیا کی حقیقی ترقی ادھوری رہے گی۔ یہ دن شکاگو کے ان مزدوروں کی یاد دلاتا ہے جن کی قربانیاں عالمی تحریک کا روپ دھار چکی ہیں۔ دنیا بھر کی ترقی محنت کشوں کی محنت کا نتیجہ ہے۔

وزیر اعظم شہباز شریف نے کہا کہ محنت کشوں کی صحت اور حفاظت کیلئے آئی ایل او کی کاوشیں قابلِ تعریف ہیں۔ مزدوروں اور محنت کشو ں میں ناخواندہ، پڑھے لکھے ، ہنر مند اور غیر ہنر مند جفاکش شامل ہیں۔ یہ لوگ کسی بھی معاشرے اور ملکی ترقی میں کلیدی کردار نبھاتے ہیں۔

انہوں نے کہا کہ  میں نے وزارتِ عظمیٰ سنبھالتے ہی کم از کم اجرت کو 25 ہزار روپے کیا۔ اللہ تعالیٰ نے مزدور کو دوست قرار دیا۔ مزدور کا پسینہ خوشک ہونے سے قبل اجرت ادا کرنے کا حکم دیا گیا جو اسلام میں مزدوروں کی حیثیت اور معاشی حقوق کی واضح تعریف قرار دی جاسکتی ہے۔