گوگل نیوز پر ہمیں فالو کریںکراچی کے علاقے کورنگی میں پولیو ویکسی نیشن ٹیم پر حملہ ہوا جس میں دو پولیو ورکرز اور ایک پولیس اہلکار زخمی ہو گئے، یہ حملہ ایک خاندان کی جانب سے کیا گیا، جس میں بیلچوں کا استعمال کیا گیا۔
پولیس نے فوری کارروائی کرتے ہوئے حملے میں ملوث چھ افراد کو گرفتار کر لیا، جن میں چار خواتین بھی شامل ہیں۔ امن و امان بحال کرنے کے لیے پولیس اور رینجرز کی بھاری نفری جائے وقوعہ پر تعینات کی گئی۔
ایس ایس پی کورنگی نے گرفتاریوں کی تصدیق کرتے ہوئے یقین دہانی کرائی کہ واقعے میں ملوث افراد کے خلاف سخت کارروائی کی جائے گی۔ زخمی پولیو ورکرز اور پولیس اہلکار کو فوری طور پر طبی امداد فراہم کی گئی۔
پاکستان میں پولیو کے خاتمے کے لیے کئی دہائیوں سے مہم جاری ہے، مگر پولیو ٹیموں کو اکثر مشکل حالات کا سامنا کرنا پڑتا ہے۔ خاص طور پر بعض علاقوں میں پولیو ورکرز پر حملے اور دھمکیوں کے واقعات سامنے آتے رہے ہیں۔ یہ واقعات انسداد پولیو کوششوں کو متاثر کرتے ہیں اور ملک میں اس مرض کے مکمل خاتمے کی راہ میں رکاوٹ بنتے ہیں۔
