گوگل نیوز پر ہمیں فالو کریںکراچی کے علاقے کلفٹن میں 22 سالہ لڑکی سلویٰ کے اغواء اور جنسی زیادتی کے کیس میں پولیس نے دعویٰ کیا ہے کہ ہم ملزمان کو آئندہ 1 سے 2 روز میں گرفتار کر لیں گے۔
تفصیلات کے مطابق ایس ایس پی ساؤتھ شیراز کو کیس کا فوکل پرسن نامزد کیا گیا ہے۔ پولیس کی طرف سے کیس میں اہم پیشرفت سامنے آگئی۔ ڈی آئی جی ساؤتھ آفس میں آج اہم میٹنگ طلب کی گئی ہے۔ پولیس کا کہنا ہے کہ ملزمان سے متعلق شواہد حاصل کر لیے گئے۔ ہمارے پاس ملزمان کی تصاویر سمیت تمام اہم معلومات موجود ہیں۔
گزشتہ رات خیابانِ نشاط اور دیگر مقامات پر چھاپے مارے گئے۔ ملزمان کی لوکیشن کراچی کے مختلف علاقوں میں ظاہر ہوئی۔ ملزمان کا تعلق اندرونِ سندھ سے بتایا جاتا ہے۔ آج میڈیکل رپورٹ میں جنسی زیادتی کے حوالے سے صورتحال واضح ہوجائے گی۔ پولیس حکام نے دعویٰ کیا کہ ملزمان 2 روز میں پولیس کے شکنجے میں ہوں گے۔
یاد رہے کہ اِس سے قبل کلفٹن میں ڈالمن مال کے سامنے سے 22 سالہ لڑکی کو 2 ملزمان نے اغواء کیا جسے پولیس کے مطابق فلیٹ پر لے جا کر زیادتی کا نشانہ بنایا گیا۔
متاثرہ لڑکی نے پولیس کے مطابق بیان دیا ہے کہ ملزمان نے مجھے ویگو گاڑی میں ڈال کر کلفٹن کے علاقے میں صبح کے وقت چھوڑا۔
مزید پڑھیں: 22سالہ لڑکی کو 2 ملزمان نے زیادتی کا نشانہ بنا ڈالا
