اسلام آباد: وزیراعظم عمران خان نے کہاہے کہ پاکستان مسلم لیگ ن نے ہمیشہ سرکاری اراضی پر قبضہ کرنے والوں کو سرپرستی فراہم کی ہے۔
ان خیالات کا اظہار انہوں نے سرکاری افسران کے اجلاس کی صدارت کرتے ہوئے کیا جس میں انہوں نے وزیر اعظم عمران کو براڈشیٹ ، غیر ملکی فنڈنگ کیس اور اراضی پر قبضہ کرنے والوں کے خلاف کریک ڈاؤن سے متعلق امور سے آگاہ کیا۔
وزیراعظم نے کہا کہ کوئی بھی شخص سیاسی سرپرستی کے بغیر سرکاری اراضی پر تجاوزات قائم نہیں کرسکتا ، انہوں نے متعلقہ حکام کو ملک میں لینڈ مافیا کے خلاف کارروائی کا دائرہ وسیع کرنے کی ہدایت کی۔
وزیر اعظم کاکہنا تھاکہ سرکاری اراضی پر دوبارہ قبضہ کرنے کی کوشش روکنے کو ’سیاسی انتقام‘ کا نام دیا گیا۔ انہوں نے حکومت کے ترجمانوں کو ہدایت کی کہ وہ زمین پر قبضہ کرنے والوں کے خلاف کی جارہی کارروائیوں کی تفصیلات سے قوم کو آگاہ کریں۔
غیر ملکی فنڈنگ کیس پر تبصرہ کرتے ہوئے وزیر اعظم نے کہا کہ جن لوگوں نے حکومت کو پھنسانے کی کوشش کی وہ اب خود اس میں پھنس گئے ہیں۔ ان کا مزید کہنا تھا کہ وہ براڈشیٹ معاملے کی شفاف اور منصفانہ تحقیقات چاہتے ہیں۔
انہوں نے مزید کہا کہ حزب اختلاف اس فریب میں ہے کہ وہ پروپیگنڈا کے ذریعے حقائق کو چھپانے میں کامیاب ہوجائیں گے لیکن ہم قومی خزانے کو نقصان پہنچانے والے ہر ایک شخص کو بے نقاب کریں گے۔
گوگل نیوز پر ہمیں فالو کریں
