گوگل نیوز پر ہمیں فالو کریںلاہور: مسلم لیگ (ن) کے سینئر رہنما رانا ثناء اللہ نے کہا ہے کہ وزیراعظم عمران خان ایک حواس باختہ انسان ہیں۔ حکومت نے ایک دن میں دس ماڈل ٹاؤن جیسے واقعات برپا کردیے۔
لاہور میں میڈیا سےگفتگو کرتے ہوئے مسلم لیگ ن کے رہنما رانا ثناءاللہ کا کہنا تھا کہ عمران خان کی گذشتہ روز کی تقریر حواس باختہ انسان کی تقریر تھی انہوں نے حواس باختہ ہوکر قوم سے خطاب کیا۔
مسلم لیگ ن کے رہنما کا کہنا تھا کہ پی ٹی آئی کی حکومت نے ریاست کا ستیاناس کردیا ہے۔ عمران خان خود بھی تو 126 دن قومی اسمبلی کے سامنے بیٹھے تھے کالعدم ٹی ایل پی کو بھی چوک یتیم خانہ پر دو ماہ بیٹھا رہنے دیتے۔ ان کا کہنا تھا کہ یہ خود سڑکیں بلاک کرتے رہے ہیں، ایسی تقاریر کرتے رہے ہیں، لیکن ان کے خلاف کسی نے طاقت کا استعمال نہیں کیا تھا۔
رانا ثنا اللہ نے مزید کہا کہ 20 اپریل کو معاہدہ ختم ہورہا تھا، تحریک لبیک کے سربراہ کو اس سے پہلے کیوں گرفتار کیا، آپ معاہدہ ختم ہونے سے 10 دن پہلے ان پر چڑھ دوڑے، گرفتاریاں شروع کردیں، اپوزیشن کو اعتماد میں لیے بغیر اتنا بڑا قدم اٹھایا گیا، یہ اپنا تھوکا ایک ایک کرکے چاٹیں گے، انہوں نے ریاست کی رٹ کو بالکل فارغ کردیا ہے۔
رانا ثنا اللہ نے سوال اٹھایا کہ فرانس کے سفیر کو نکالنے کے وعدے کا معاملہ 5 ماہ میں پارلیمنٹ میں کیوں نہیں لائے، آپ معاملہ پارلیمنٹ میں لےآتے تو پارلیمنٹ تحریک لبیک کے لوگوں سے بات کرتی، سمجھانے والی بات سمجھائی جاتی ہے۔
یہ بھی پڑھیں: قومی اسمبلی میں فرانس کے سفیر کو ملک بدر کرنے کی قرارداد پیش کردی گئی
