گوگل نیوز پر ہمیں فالو کریںاسلام آباد: پاکستان سمیت دنیا بھر میں مظلوم کشمیریوں سے اظہارِ یکجہتی کیلئے یومِ استحصالِ کشمیر آج منایا جارہا ہے جبکہ کشمیر سے یکجہتی کے اظہار کیلئے وزیرِ اعظم آزاد کشمیر اسمبلی سے آج خطاب کریں گے۔
سماجی رابطے کی ویب سائٹ ٹوئٹر پر اپنے پیغام میں وزیرِ اعظم عمران خان نے کہا کہ یومِ استحصالِ کشمیر کے موقعے پر اہلِ کشمیر سے اظہارِ یکجہتی کیلئے میں آج آزاد جموں و کشمیر کی اسمبلی سے خطاب کروں گا۔
پیغام میں وزیرِ اعظم عمران خان نے کہا کہ گزشتہ برس 5 اگست کے غیر قانونی اقدامات کے بعد سے اہلِ کشمیر کو بھارت کے ہاتھوں ظالمانہ اور سفاک فوجی محاصرے کا سامنا ہے۔
یومِ استحصالِ کشمیر کے موقعے پر کشمیر میں بھارتی جارحیت کی مذمت کرتے ہوئے وزیرِ اعظم عمران خان نے کہا کہ بھارت کی طرف سے مقبوضہ کشمیر میں آبادی کے تناسب میں تبدیلی کی کوششیں بھی جاری ہیں۔
سفارتی جدوجہد کے عزم کا اعادہ کرتے ہوئے وزیرِ اعظم عمران خان نے کہا کہ بھارت نے مقبوضہ جموں و کشمیر پر غیر قانونی قبضے کے ذریعے جن کشمیریوں کی آواز دبانے کی کوشش کی، میں بطورِ سفیر سب کی آواز بنا رہوں گا۔
پاکستان کے گزشتہ سفارتی اقدامات پر وزیرِ اعظم عمران خان نے کہا کہ برسوں بعد میری حکومت نے کشمیر کا مقدمہ مؤثر انداز میں اقوامِ متحدہ میں اٹھایا اور مودی کے نسل پرست ہندوتوا ایجنڈے کو بے نقاب کیا۔
ہندوستان نےمقبوضہ جموں و کشمیر پرغیر قانونی قبضے کے ذریعے جن کشمیریوں کی آواز گُل کرنے کی کوشش کی میں بطورِ سفیر ان سب کی آواز بنا رہوں گا۔ برسوں بعد میری حکومت نے کشمیر کا مقدمہ نہایت مؤثر طور پر اقوام متحدہ میں اٹھایا اور مودی سرکار کی نسل پرست فسطائیت (ہندوتوا) کو بے نقاب کیا۔
— Imran Khan (@ImranKhanPTI) August 5, 2020
وزیرِ اعظم عمران خان نے کہا کہ ہم نے اہلِ کشمیر کی امنگوں اور اقوامِ متحدہ کی سلامتی کونسل کی قراردادوں کے حوالے سے اپنے عزائم اور مؤقف کو کل جاری ہونے والے پاکستان کے سیاسی نقشے میں اجاگر اور نمایاں کردیا ہے۔
ہم نے اہلِ کشمیر کی امنگوں اور اقوامِ متحدہ کی سلامتی کونسل کی قراردادوں کے حوالے سے اپنے عزائم و مؤقف کو کل جاری ہونے والے پاکستان کے سیاسی نقشے میں بھی اجاگر اور نمایاں کر دیا ہے۔
— Imran Khan (@ImranKhanPTI) August 5, 2020
یاد رہے کہ اِس سے قبل وزیرِ اطلاعات شبلی فراز نے کہا کہ مقبوضہ جموں و کشمیر میں آج سے ٹھیک 1 سال قبل تاریخ کا بد ترین کرفیو لگایا گیا جبکہ مظلوم کشمیری آج بھی بنیادی انسانی حقوق سے محروم ہیں۔
ٹوئٹر پر اپنے پیغام میں وزیرِ اطلاعات شبلی فراز نے کہا کہ 5 اگست 2019ء کو بھارت نے کشمیریوں کی شناخت چھیننے کی کوشش کی جبکہ اِس غیر قانونی اور سیاہ اقدام کو 1 سال ہوگیا۔
مزید پڑھیں: کشمیری بنیادی انسانی حقوق سے محروم ہیں۔شبلی فراز
