وزیراعظم کا گلگت بلتستان میں پانی کے اخراج سے ہونے والی تباہی پر ہنگامی اقدامات کاحکم

اسلام آباد: وزیراعظم شہباز شریف نے گلگت بلتستان میں شیشپر گلیشیئر جھیل سے پانی کے اخراج سے ہونے والی تباہی کے بعد ہنگامی بنیادوں پر اقدامات کرنے کی ہدایت کی ہے۔

وزیراعظم نے لوگوں کی جان و مال کو بچانے اور انہیں محفوظ مقامات پر منتقل کرنے کی ہدایت کی۔ انہوں نے متاثرہ علاقوں میں خوراک، ادویات اور ضروری سامان فراہم کرنے کا حکم دیا۔

انہوں نے وفاقی حکومت کے اداروں کو ہدایت کی کہ وہ گلگت بلتستان کی حکومت کو ہر ممکن مدد اور تعاون فراہم کریں۔ انہوں نے نقصانات اور متاثرہ افراد کی رپورٹ بھی طلب کی۔

وزیر اعظم شہباز شریف نے شاہراہ قراقرم پر حسن آباد پل کی تباہی کے باعث متبادل سڑک تیار کرنے کا مشورہ دیا۔ انہوں نے آبپاشی اور پینے کے پانی کے نظام کی تباہی اور دو متاثرہ پاور ہاؤسز کے حوالے سے تخمینہ تیار کرنے کا مشورہ بھی دیا۔

انہوں نے 700 اور 250 میگاواٹ کے پاور ہاؤسز کو ہنگامی بنیادوں پر بحال کرنے کا حکم دیا۔ انہوں نے کہا کہ ان پاور ہاؤسز کی بحالی اور دیکھ بھال پر اٹھنے والے اخراجات وفاقی حکومت برداشت کرے گی۔

مزید پڑھیں:سندھ میں پانی کی قلت، بیراجز میں سطحِ آب کم ہوگئی، عوام سراپا احتجاج

انہوں نے شاہراہ قراقرم پر ہونے والے نقصانات کی رپورٹ طلب کی۔ انہوں نے یقین دلایا کہ حکومت متاثرہ افراد کو ہنگامی امداد فراہم کرنے اور ان کی بحالی کے لیے ہر ممکن اقدامات کرے گی۔ انہوں نے نقصانات پر متاثرہ افراد سے ہمدردی اور افسوس کا اظہار بھی کیا۔