نیب کے 2 ریفرنسز پر سماعت، وزیر اعظم کا عدالت میں آج پیش نہ ہونے کا فیصلہ

اسلام آباد: وزیر اعظم شہباز شریف نے نیب کے 2 ریفرنسز پر آج ہونے والی سماعت کے دوران عدالت میں پیش نہ ہونے کا فیصلہ کیا ہے۔ وزیر اعلیٰ پنجاب حمزہ شہباز بھی عدالت میں پیش نہیں ہوسکیں گے۔

تفصیلات کے مطابق نیب کے آمدن سے زائد اثاثہ جات کیس میں وزیر اعظم شہباز شریف اور وزیر اعلیٰ حمزہ شہباز کو پیش ہونا تھا، تاہم وزیر اعظم آج ہونے والے پارلیمانی کمیٹی برائے قومی سلامتی کے اجلاس میں شرکت کے باعث حاضر نہیں ہوسکیں گے۔

یہ بھی پڑھیں:

ملکی مسائل پر اہم فیصلے متوقع، قومی سلامتی کمیٹی کا اجلاس آج ہوگا

وزیر اعظم کے خلاف نیب کے 2 ریفرنسز پر سماعت ہوگی۔ وزیر اعلیٰ حمزہ شہباز کے خلاف رمضان شوگر ملز کیس کی سماعت ہوگی۔ قانونی ٹیم نے وزیر اعظم اور وزیر اعلیٰ کی عدالت میں سماعت کے دوران حاضری سے استثنیٰ کیلئے درخواستیں تیار کر لیں۔

قبل ازیں عدالت نے وزیر اعظم شہباز شریف کی رمضان شوگر ملز کیس میں حاضری سے استثنیٰ کی درخواست منظور کر لی تھی جبکہ وزیر اعلیٰ حمزہ شہباز کی طرف سے بھی پنجاب میں سیاسی بحران کے باعث حاضری سے استثنیٰ کی درخواست دائر کی جائیگی۔

خیال رہے کہ اسپیکر قومی اسمبلی راجہ پرویز اشرف کی زیرِ صدارت پارلیمانی کمیٹی برائے قومی سلامتی کا اجلاس آج ہوگا جس کے دوران ملکی مسائل پر اہم فیصلے متوقع ہیں۔

پارلیمانی کمیٹی برائے قومی سلامتی کا اجلاس آج سہ پہر 3 بجے ہوگا جس کی صدارت اسپیکر راجہ پرویز اشرف کریں گے۔ کمیٹی اراکین کو قومی سلامتی کو درپیش موجودہ مسائل پر بریفنگ دی جائے گی۔