وزیر اعظم کی برطانوی ہائی کمشنر سے ملاقات، دوطرفہ تعلقات پر گفتگو

اسلام آباد: وزیر اعظم شہباز شریف نے برطانوی ہائی کمشنر ڈاکٹر کرسچن ٹرنر سے ملاقات کی جس کے دوران پاک برطانیہ دو طرفہ تعلقات اور باہمی دلچسپی کے امور پر تبادلۂ خیال کیا گیا ہے۔

تفصیلات کے مطابق برطانوی ہائی کمشنر ڈاکٹر کرسچن ٹرنر سے ملاقات کےد وران وزیر اعظم شہباز شریف نے دونوں ممالک کے مابین تجارت اور سرمایہ کاری پر مبنی دو طرفہ تعلقات کو فروغ دینے کی اہمیت پر زور دیتے ہوئے کہا کہ دونوں ممالک کی دوستی کو اسٹرٹیجک سطح پر لایا جاسکتا ہے۔

یہ بھی پڑھیں:

فارن فنڈنگ کیس، پی ٹی آئی نے 30 روز میں فیصلہ کرنیکا حکم چیلنج کردیا

آج صبح کے وقت اسلام آباد میں ہونے والی ملاقات کے دوران برطانوی ہائی کمشنر نے شہباز شریف کو وزیرا عظم کا عہدہ سنبھالنے پر مبارکباد دی اور برطانوی حکومت کی نیک خواہشات پر مبنی پیغام بھی پہنچایا۔ وزیراعظم نے برطانوی ہم منصب بورس جانسن کا ٹوئٹر پیغام پر شکریہ ادا کیا۔

قبل ازیں اپنے ٹوئٹر پیغام میں برطانوی وزیر اعظم بورس جانسن نے شہباز شریف کو وزیر اعظم بننے پر مبارکباد دی تھی۔ وزیر اعظم شہباز شریف نے برطانوی ہائی کمشنر سے ملاقات کے دوران گفتگو کرتے ہوئے کہا کہ پاکستان برطانیہ کے ساتھ اپنے تعلقات کوبے حد اہمیت دیتا ہے۔

گفتگو کے دوران وزیر اعظم نے کہا کہ پاک برطانیہ تعلقات تاریخی بنیادوں پر استوار ہیں اور وسیع البنیاد معاملات پر دونوں ممالک مشترکہ مفادات رکھتے ہیں۔ پاکستان کے 16 لاکھ شہری برطانوی حکومت اور عوام کی خدمت میں اپنا اپنا کردار ادا کر رہے ہیں۔