وزیر اعظم نے تحریکِ انصاف کی سنٹرل ایگزیکٹو کمیٹی کا اجلاس آج طلب کرلیا

اسلام آباد: وزیر اعظم عمران خان نے تحریکِ انصاف کی سنٹرل ایگزیکٹو کمیٹی (سی ای سی) کا اجلاس آج طلب کر لیا ہے جو بنی گالہ میں منعقد ہوگا۔

آج ہونے والے سی ای سی اجلاس میں پارلیمانی بورڈ کی تشکیل سمیت اہم معاملات پر مشاورت ہوگی۔ سنٹرل ایگزیکٹو کمیٹی پارلیمانی بورڈ کیلئے ناموں کی منظوری دے گی۔

یہ بھی پڑھیں:

اپوزیشن تیار ہوجائے، پی ٹی آئی نے انتخابی مہم شروع کردی۔فیصل جاوید

خیال رہے کہ اس سے قبل پی ٹی آئی کے سینیٹر فیصل جاوید خان کا کہنا تھا کہ تحریکِ انصاف نے انتخابی مہم شروع کردی ہے۔ اپوزیشن تیار ہوجائے، پارلیمانی بورڈ تشکیل دینگے۔

سماجی رابطے کی ویب سائٹ ٹوئٹر پر2 روز قبل رات گئے اپنے پیغام میں سینیٹر فیصل جاوید خان نے کہا کہ تحریکِ انصاف نے انتخابی مہم کا آغاز کردیا۔

ٹوئٹر پیغام میں سینیٹر فیصل جاوید خان نے کہا کہ پارلیمانی بورڈ جلد تشکیل دیں گے جس میں پی ٹی آئی کے نظریاتی کارکنان کو اوّلین ترجیح دی جائے گی۔

ٹوئٹر پیغام میں سینیٹر فیصل جاوید خان نے کہا کہ انتخابات الیکٹرانک ووٹنگ مشین پر ہوں گے اور سمندر پار پاکستانیوں کو انٹرنیٹ کے ذریعے ووٹنگ کا موقع دیا جائے گا۔

پیغام میں سینیٹر فیصل جاوید خان نے کہا کہ اپوزیشن بھی تیار ہوجائے۔ وزیر اعظم کی زیر صدارت آج ہونے والے سی ای سی اجلاس میں پارلیمانی بورڈ تشکیل دیا جائے گا۔