گوگل نیوز پر ہمیں فالو کریںاسلام آباد: وزیرِ اعظم عمران خان نے مودی حکومت کو خبردار کرتے ہوئے کہا ہے کہ بھارت پاکستان کی امن پسندی کو کمزوری نہ سمجھے جبکہ یومِ یکجہتئ کشمیر کے موقعے پر پوری قوم مسئلۂ کشمیر کے حل کیلئے متحد ہے۔
سماجی رابطے کی ویب سائٹ ٹوئٹر پر اپنے پیغام میں وزیرِ اعظم عمران خان نے کہا کہ اقوامِ متحدہ کا ادارہ سلامتی کونسل متعدد قراردادوں کے ذریعے کشمیریوں کے جائز حقِ خود ارادیت کی توثیق کرچکا ہے جس کیلئے ہم اپنے عزمِ مصمم کا اعادہ کرتے ہیں۔
یومِ یکجہتئ کشمیر کے موقعے پر اپنے پیغام میں وزیرِ اعظم عمران خان نے کہا کہ پاکستان مظلوم کشمیریوں کی جائز جدوجہدِ آزادی میں پورے اتحاد و اتفاق سے ان کے ساتھ کھڑا ہے۔
آج #KashmirSolidarityDay کےموقع پر میں اس امر کا اعادہ کرتا ہوں کہ پاکستان حقِ خودارادیت، جس کی بین الاقوامی برادری سلامتی کونسل کی متعدد قرادردادوں کے ذریعےتوثیق کر چکی ہے، کی جائز جدوجہد میں پورے اتحاد و اتفاق سے اہلِ کشمیر کیساتھ ڈٹ کر کھڑا ہے۔
— Imran Khan (@ImranKhanPTI) February 5, 2021
پیغام میں وزیرِ اعظم عمران خان نے کہا کہ اگر بھارت اقوامِ متحدہ کے ادارے سلامتی کونسل کی قراردادوں کی روشنی میں مسئلۂ کشمیر کے منصفانہ حل میں سنجیدگی کا مظاہرہ کرے تو پاکستان امن کیلئے 2 قدم آگے بڑھنے کو تیار ہے۔
وزیرِاعظم عمران خان نے کہا کہ امن و استحکام کی ہماری خواہش پر کسی کو کوئی غلط فہمی نہیں ہونی چاہئے اور نہ ہی بھارت اسے ہماری کمزوری کی علامت سمجھے۔ امن کی خواہش پاکستان کی کمزوری نہیں ہے۔
اگر بھارت اقوامِ متحدہ کی سلامتی کونسل کی قرادادوں کی روشنی میں تنازعہ کشمیر کے منصفانہ حل میں سنجیدگی دکھائے تو پاکستان امن کی خاطر دوقدم آگے بڑھنے کو تیار ہے۔ مگر امن و استحکام کی ہماری یہ خواہش کسی کو غلط فہمی میں ڈالے نہ ہی اسے ہماری کمزوری کی علامت شمار کیا جائے۔
— Imran Khan (@ImranKhanPTI) February 5, 2021
انہوں نے کہا کہ پاکستان امن کی خواہش رکھتا ہے جو من حیث القوم ہماری قوت اور اعتماد کا نتیجہ ہے کہ پاکستان مظلوم کشمیریوں کی جائز امنگوں کے مطابق مسئلۂ کشمیر کے منصفانہ حل کیلئے غیر معمولی اقدامات اٹھا سکتا ہے۔
بلکہ یہ تو بطور قوم ہماری قوت اور اعتماد کا نتیجہ ہےکہ ہم اہلِ کشمیر کی جائز امنگوں کے مطابق معاملے کے منصفانہ حل کیلئے غیر معمولی کاوش پر آمادہ ہیں۔
— Imran Khan (@ImranKhanPTI) February 5, 2021
یہ بھی پڑھیں: جدوجہدِ آزادئ کشمیر کا مقدر صرف کامیابی ہے۔وزیرِ خارجہ
