عمران خان کا روسی صدر سے رابطہ، اسلاموفوبیا پر بیان کا خیر مقدم

اسلام آباد: وزیر اعظم عمران خان نے روسی صدر سے رابطہ کیا اور اسلاموفوبیا سے متعلق بیان کا خیر مقدم کرتے ہوئے ولادی میرپیوٹن کو خراجِ تحسین پیش کیا ہے۔

سماجی رابطے کی ویب سائٹ ٹوئٹر پر اپنے پیغام میں وزیر اعظم عمران خان نے کہا کہ میں نے روس کے صدر ولادی میر پیوٹن سے بات چیت کی ہے جس کا بنیادی مقصد ان کے اس بیان کو سراہنا تھا کہ آزادئ اظہارِ رائے کا مطلب ہمارے نبی ﷺ کی توہین نہیں ہوسکتا۔

یہ بھی پڑھیں:

توہینِ رسالت سے متعلق روسی صدر کے بیان کا خیر مقدم کرتا ہوں۔وزیر اعظم

ٹوئٹر پیغام میں وزیر اعظم عمران خان نے روسی صدر کے بیان کو سراہتے ہوئے کہا کہ ولادی میر پیوٹن وہ پہلے مغربی رہنما ہیں جنہوں نے مسلمانوں کے اپنے پیارے نبی ﷺ کیلئے جذبات پر ہمدردی اور حساسیت کا مظاہرہ کیا اور اسلاموفوبیا کے خلاف بیان دیا۔

Just spoke to President Putin primarily to express my appreciation for his emphatic statement that freedom of speech could not be a pretext to abuse our Prophet PBUH. He is the first Western leader to show empathy & sensitivity to Muslim sentiment for their beloved Prophet PBUH

— Imran Khan (@ImranKhanPTI) January 17, 2022

وزیر اعظم عمران خان نے اپنے روسی صدر سے ٹیلیفونک رابطے کے متعلق مزید کہا کہ ہم نے تجارت اور پاک روس دو طرفہ تعاون سمیت دیگر باہمی دلچسپی کے امور پر بھی گفتگو کی۔ دونوں سربراہانِ مملکت نے ایک دوسرے کو اپنے اپنے ملک آمد کی دعوت دی۔ 

ولادی میر پیوٹن کا بیان

روس کے صدر ولادی میر پیوٹن نے دسمبر میں اپنی سالانہ پریس کانفرنس کے دوران کہا کہ پیغمبرِ اسلام ﷺ کی شان میں گستاخی عوام میں اشتعال کا سبب ہے جو اپنی رائے کے اظہار کی آزادی قرار نہیں دی جاسکتی جبکہ یہ مذہبی آزادی کے خلاف ہے۔

صدر ولادی میر پیوٹن نے کہا کہ شانِ رسالت ﷺ میں گستاخی سے مسلمانوں کے جذبات مجروح ہوتے ہیں۔ انہوں نے متنازعہ فرانسیسی میگزین کی جانب سے گستاخانہ خاکوں کی اشاعت کی نشاندہی کرتے ہوئے کہا کہ اس قسم کی حرکتیں انتہا پسندی کا سبب بنتی ہیں۔