وزیر اعظم کی زیر صدارت وفاقی کابینہ اجلاس، ملکی صورتحال پر گفتگو

اسلام آباد: وزیر اعظم عمران خان کی زیر صدارت وفاقی کابینہ اجلاس وزیر اعظم ہاؤس میں منعقد ہوا ہے جس میں ملک کی موجودہ سیاسی صورتحال بالخصوص سپریم کورٹ کا فیصلہ سامنے آنے کے بعد قومی منظر نامے پر پیدا ہونے والی بڑی تبدیلیوں پر غور وخوض کیا گیا۔

تفصیلات کے مطابق وزیر اعظم عمران خان نے آج وفاقی کابینہ اجلاس کی صدارت کی جس میں ملک کی سیاسی و اقتصادی صورتحال زیر غور آئی۔ قبل ازیں ڈی جی آئی ایس آئی لیفٹیننٹ جنرل ندیم انجم سے ملاقات کے دوران وزیر اعظم نے سیکیورٹی صورتحال پر بات چیت کی۔

یہ بھی پڑھیں:

دھمکی آمیز خط، حکومت نے بیرونی سازش پر تحقیقاتی کمیشن قائم کردیا

ڈی جی آئی ایس آئی سے ملاقات کے علاوہ آج وزیر اعظم نے تحریکِ انصاف کی سیاسی کمیٹی کے اجلاس کی صدارت بھی کی جس میں وزیر دفاع پرویز خٹک، اسد عمر، فواد چوہدری اور وزیر داخلہ شیخ رشید احمد شریک ہوئے۔

وزیر اعظم کی زیر صدارت سیاسی کمیٹی اجلاس میں وزیرِ مملکت برائے اطلاعات فرخ حبیب، وزیر خزانہ شوکت ترین اور مشیر پارلیمانی امور بابر اعوان بھی شریک ہوئے۔ قبل ازیں وزیر داخلہ شیخ رشید احمد کا کہنا تھا کہ 3 ماہ پہلے ہی مستعفی ہونے کا کہہ دیا تھا۔

خیال رہے کہ قومی اسمبلی کا اجلاس کل طلب کیا گیا ہے جس میں وزیر اعظم کے خلاف تحریکِ عدم اعتماد پر ووٹنگ ہوگی تاہم بعض تجزیہ کاروں کا کہنا ہے کہ وزیر اعظم عمران خان آج کسی بھی وقت مستعفی ہونے کا اعلان کرکے عدم اعتماد سے بچ سکتے ہیں۔