گوگل نیوز پر ہمیں فالو کریںاسلام آباد: وزیراعظم عمران خان نے ماسکو میں روسی صدر ولادیمیر پیوٹن سے ملاقات کی جس میں دونوں رہنماؤں نے دو طرفہ تعلقات اور دیگر اہم امور پر تبادلہ خیال کیا۔
روسی صدر سے ملاقات سے قبل وزیر اعظم عمران خان نے روس کے جنگ عظیم دوم میں شہید ہونے والے سپاہیوں کو خراج تحسین پیش کیا تھا۔
تین گھنٹے طویل ملاقات میں دونوں رہنماؤں نے اقتصادی اور توانائی کے تعاون بالخصوص پاکستان سٹریم گیس پائپ لائن سمیت دو طرفہ تعلقات کی تمام صفوں کا جائزہ لیا۔ یوکرین کے ترقی پذیر منظر نامے سمیت علاقائی صورتحال بھی زیر بحث آئی۔
وزیراعظم عمران خان کے اس سے قبل روسی فیڈریشن کے ایگزیکٹو ہیڈ کوارٹر کریملن پہنچنے پر صدر پیوٹن نے ان کا پرتپاک استقبال کیا۔ 23 سال کے وقفے کے بعد کسی پاکستانی وزیر اعظم کا روس کا یہ پہلا دو طرفہ دورہ ہے اور اسے دونوں ممالک کے درمیان تعلقات کی تجدید کے لیے ایک تاریخی قدم قرار دیا جا رہا ہے۔
وزیراعظم عمران خان گزشتہ روز دو روزہ سرکاری دورے پر ماسکو پہنچے جہاں ائیرپورٹ پر روس کے نائب وزیر خارجہ نے ان کا استقبال کیا اور ائیرپورٹ پر گارڈ آف آنر پیش کیا۔
وزیر اعظم کے ہمراہ اعلیٰ سطح کا وفد بھی تھا جس میں وفاقی وزراء شاہ محمود قریشی، چوہدری فواد حسین، اسد عمر اور حماد اظہر، مشیر تجارت عبدالرزاق داؤد، قومی سلامتی کے مشیر معید یوسف اور ایم این اے عامر محمود کیانی شامل تھے۔
شاہ محمود قریشی اور ہم منصب کی ملاقات:
وزیر خارجہ شاہ محمود قریشی اور ان کے روسی ہم منصب کی علیحدہ ملاقات بھی ہوئی، اس دوران اہم علاقائی اور عالمی امور پر تبادلہ خیال کیاگیا۔
ملاقات کے دوران پاکستان اور روس نے دوطرفہ تعلقات کو مزید مضبوط بنانے کے عزم کا اعادہ کیا، شاہ محمود قریشی نے اپنے ہم منصب کو یقین دلایا کہ اسلام آباد ماسکو کے ساتھ اپنے تعلقات کو اہمیت دیتا ہے۔
شاہ محمود قریشی نے کہا کہ پاکستان روس کے ساتھ دوطرفہ تعلقات کو خصوصی اہمیت دیتا ہے۔وزیر خارجہ نے کہا کہ پاکستان وزیراعظم عمران خان کے وژن کے تحت اقتصادی ترجیحات اور علاقائی روابط کے فروغ کے ایجنڈے پر عمل پیرا ہے۔
مزید پڑھیں: وزیراعظم کی زیرقیادت ماسکو میں اعلیٰ سطحی اجلاس،بدلتی صورتحال پر تبادلہ خیال
