وزیرِ اعظم نے کامیاب جوان قرض کی حد 50 لاکھ سے بڑھا کر ڈھائی کروڑ کردی

اسلام آباد: وزیرِ اعظم پاکستان عمران خان نے ملک بھر کے نوجوانوں کیلئے اہم فیصلہ کرتے ہوئے  کامیاب جوان پروگرام میں دئیے جانے والے قرض کی حد 50 لاکھ سے بڑھا کر ڈھائی کروڑ روپے کردی ہے۔

وفاقی دارالحکومت اسلام آباد میں وزیرِ اعظم عمران خان سے مشیرِ خزانہ ڈاکٹر حفیظ شیخ اور معاونِ خصوصی عثمان ڈار نے ملاقات کی جس کے دوران وزیرِ اعظم نے کامیاب جوان پروگرام کے تحت دی جانے والی رقم بڑھانے کی منظوری دے دی جس کے تحت نوجوان 2 کروڑ 50 لاکھ تک کی رقم حاصل کرسکیں گے۔

لاک ڈاؤن کے پیشِ نظر وزیراعظم عمران خان نے ہدایت کی کہ حالات بہتر ہوتے ہی نوجوانوں میں رقم کی تقسیم کا عمل تیز کردیا جائے۔ پاکستان کے تمام بینکوں کو کامیاب جوان پروگرام میں شامل کرنے کی بھی منظوری دے دی گئی۔

اس موقعے پر گفتگو کرتے ہوئے وزیر اعظم عمران خان نے کہا کہ   نوجوانوں کو مزید سہولت دیں تا کہ بڑے کاروبار کر سکیں ۔ لاک ڈاؤن میں نرمی آتے ہی نوجوانوں کو کاروباری میدان میں آگے لایا جائے۔ نوجوان ملک کا اثاثہ ہیں۔ ان پر مزید سرمایہ کاری کریں گے۔

وزیرِ اعظم آفس سے جاری کردہ بیان کے مطابق وزیرِ اعظم عمران خان نے بلا سود یا معمولی شرحِ سود پر دئیے جانے والے قرض کے حوالے سے کہا کہ رقم کی ترسیل سے نوجوان ملکی معیشت کو سنبھال سکیں گے جبکہ معیشت کو سنبھالنے میں نوجوانوں کا کردار اہم ہے۔