اوورسیز پاکستانیوں سے سفارتخانے اپنا رویہ تبدیل کریں، وزیراعظم عمران خان

اسلام آباد: وزیر اعظم عمران خان نے کہا ہے کہ اوورسیز پاکستانیوں سے سفارتخانے اپنا رویہ تبدیل کریں۔

وزیراعظم عمران خان نے ان خیالات کا اظہار دنیا بھر میں تعینات پاکستانی سفیروں سے خطاب کرتے ہوئے کیا، وزیر اعظم نے کہا کہ پاکستانی سفارتخانے جس طرح چل رہے ہیں، سفارت خانے ایسے نہیں چل سکتے۔

وزیر اعظم عمران خان نے کہا کہ بدقسمتی سے ہمارے سفیروں کا بیرون ملک مقیم پاکستانیوں سے رویہ نا مناسب ہوتا ہے، سعودی عرب میں پاکستانی سفارتخانے میں پریشان کن صورتحال پیدا ہوئی، سعودی عرب میں سفارتخانے سے ملنے والے فیڈ بیک پریشان کن تھے،۔

انہوں نے کہا کہ سمندرپار پاکستانی ہمارا قیمتی اثاثہ ہیں، خواہش ہے کہ ہمارے سفیروں کا اوورسیز پاکستانیوں سے رویہ بہتر رہے، سفارت خانوں کا کام اپنے شہریوں کو سروس دینا ہے، سفارت خانوں کا نوآبادیاتی دور والا رویہ ناقابل قبول ہے، سفارتخانے اووسیز پاکستانیوں سے اپنا رویہ تبدیل کریں۔

انہوں نے کہا کہ سٹیزن پورٹل پر سفارتی عملے کی غیرموجودگی کی شکایت ملی۔ سعودی عرب اور متحدہ عرب امارات سے سب سے زیادہ ترسیلات زرآتی ہیں، اور ان اوورسیز پاکستانیوں کی ترسیلات کی وجہ سے پاکستان دیوالیہ پن سے محفوظ رہا ہے۔

وزیر اعظم کا کہنا تھا کہ ہمارے سفیر جو وقت دیتے ہیں اس پر ملتے نہیں،عوامی شکایات کے ازالے کے لیے سفارت خانوں میں کوئی نظام وضع نہیں،سٹیزن پورٹل پر سفارتی عملے کی غیرموجودگی کی شکایات ملیں۔وزیر اعظم کا کہنا تھا کہ اوورسیز پاکستانیوں سے نامناسب رویہ برداشت نہیں کیا جائے گا۔