وزیر اعظم آزاد کشمیر کا اقدام، عدم اعتماد جمع کرانیوالے 4 وزراء عہدوں سے فارغ

مظفر آباد: وزیر اعظم آزاد کشمیر سردار عبدالقیوم نیازی نے اپنے خلاف تحریکِ عدم اعتماد جمع کرانے والے 4 وزراء کو عہدوں سے برطرف کردیا ہے۔

تفصیلات کے مطابق وفاقی دارالحکومت اسلام آباد، بلوچستان، پنجاب اور خیبر پختونخوا کے بعد سیاسی بحران نے آزاد کشمیر کا رخ کر لیا۔ وزیر اعظم عبدالقیوم نیازی نے بدعنوانی اور مشکوک سرگرمیوں کے الزام پر اپنے 4 وزراء کو عہدوں سے فارغ کیا۔

یہ بھی پڑھیں:

عمران خان نے وزیر اعظم آزاد کشمیر کو استعفے سے روک دیا

برطرف کیے گئے وزراء میں وزیرِ فزیکل پلاننگ، ہاؤسنگ اور سیاحت سردار تنویر الیاس، وزیر خزانہ عبدالماجد خان، وزیرِ بلدیات خواجہ فاروق احمد اور وزیرِ خوراک آزاد کشمیر علی شان سونی شامل ہیں جن پر سنگین الزامات عائد کیے گئے۔

وزیر اعظم آزاد کشمیر سردار عبدالقیوم نیازی نے وزراء کی برطرفی کا حکم نامہ جاری کردیا جس میں کہا گیا ہے کہ چاروں وزراء بدعنوانی اور مشکوک سرگرمیوں میں ملوث تھے۔ حال ہی میں مذکورہ وزراء نے عبدالقیوم نیازی کے خلاف تحریک جمع کرائی تھی۔ 

خیال رہے کہ تحریکِ عدم اعتماد کے تناظر میں وزیر اعظم آزاد کشمیر سردار عبدالقیوم نیازی اپنے عہدے سے مستعفی ہونے کیلئے تیار تھے، تاہم چیئرمین پی ٹی آئی عمران خان نے انہیں مستعفی نہ ہونے کی ہدایت کی ہے۔