انگلینڈ میں کرکٹ کھیلنے کی اہمیت دیگر ممالک سے مختلف ہے۔شان مسعود

قومی کرکٹ ٹیم کے مشہور بیٹسمین شان مسعود نے کہا ہے کہ تاریخی اعتبار سے انگلینڈ میں کرکٹ کھیلنے کی اہمیت دیگر ممالک سے مختلف ہے کیونکہ کرکٹ یہاں سے شروع ہوئی۔

سماجی رابطے کی ویب سائٹ ٹوئٹر پر جاری کردہ ویڈیو پیغام میں کرکٹر شان مسعود نے کہا کہ انگلینڈ میں کرکٹ ایجاد ہوئی، یہاں کرکٹ کھیلنا الگ اہمیت رکھتا ہے جبکہ انگلینڈ میں ہمارے سابقہ قومی کھلاڑی بھی بہترین کھیل پیش کر چکے ہیں۔

ویڈیو پیغام میں کرکٹر شان مسعود نے کہا کہ عامر سہیل نے انگلینڈ میں ڈبل سنچری کی، یہاں کھیلنا عالمی کرکٹ کے ہر کھلاڑی کی خواہش ہوتی ہے۔ جب ہم چھوٹے تھے اور کرکٹ ٹی وی پر دیکھتے تھے ، اوول گراؤنڈ میں ہم نے قومی کرکٹ ٹیم کے سابق اوپنر سعید انور کی سنچری بھی دیکھی ہے۔

شان مسعود نے کہا کہ محسن حسن خان نے ڈبل سنچری کی، یونس خان اور محمد یوسف کی لیڈز گراؤنڈ پر پارٹنرشپ ہمارے سامنے ہے۔ انگلینڈ میں اچھی ٹیم کے خلاف پرفارم کرنا اہم سمجھا جاتا ہے۔ یہاں کچھ الگ نہیں ہے۔ ہر کھلاڑی بڑی سوچ رکھتے ہوئے بہترین کھیل کی خواہش رکھتا ہے۔

انہوں نے کہا کہ ہر کھلاڑی کیلئے اہم بات یہ ہے کہ وہ اپنی ٹیم کو زبردست اسکور کرکے دے۔ جب کوئی کھلاڑی سنچری کرتا ہے تو اس کی ٹیم کو اچھے نتائج ملتے ہیں۔ ہماری بھی کوشش ہوگی کہ انگلینڈ کے خلاف بہترین کھیل پیش کریں۔

ICYMI: @shani_official talks about the achievements of past Pakistan batsmen in England and how the current batsmen seek inspiration from those performances

Full Video: https://t.co/8EqvUC5hZD pic.twitter.com/Q02E4ISgwz

— Pakistan Cricket (@TheRealPCB) July 15, 2020

یہ بھی پڑھیں: یونس خان  ساتھیوں کی مدد کرتے تھے۔شان مسعود