پی آئی اے حادثہ،قومی سانحہ، شوبز شخصیات بھی رنجیدہ ہوگئیں

لاہور:سانحہ پی آئی اے،قومی سانحہ، شوبز شخصیات بھی رنجیدہ ہوگئیں،شوبز سے تعلق رکھنے والی شخصیات نے کراچی میں قومی ائیر لائن کے طیارے کو پیش آنے والے حادثے پر گہرے رنج و غم کااظہار کرتے ہوئے کہا ہے کہ یہ قومی سانحہ ہے جس پر پوری قوم رنجیدہ ہے۔شوبز شخصیات کا کہنا تھا کہ عید کے موقع پر ایسا سانحہ کسی المیے سے کم نہیں۔

اس سانحہ سے متعلق اداکارہ ثنا، احسن خان،معمر رانا، سعود، روبی انعم، ذوالقرنین حیدر،شبنم مجید،ملک یعقوب نور، سائرہ نسیم، عارف لوہار،ببرک شاہ، آغا قیصر عباس، لاشانہ،نعیم الحسن ببلو، سمیت دیگر نے اپنے بیانات میں کہا کہ کورونا وائرس کی وباء سے ہونے والی ہلاکتوں کی وجہ سے پوری قوم پہلے ہی دکھ اور تکلیف میں مبتلا تھی کہ پی آئی اے کے طیارے کو پیش آنے والے اندوہناک حادثے نے پوری قوم کا دکھ مزید بڑھا دیا ہے۔

اور ایسے حالات میں عید کی خوشیاں بھی مانند پڑ گئی ہیں۔شوبز شخصیات کا کہنا تھا کہ پوری قوم کورونا وائرس سے زندگی کی بازی ہارنے اور طیارے کے حادثے میں شہید ہونے والوں کے غم میں برابر کی شریک ہے اور دعاہے کہ اللہ تعالیٰ غمزدہ خاندانوں کو صبر جمیل دے۔

شوبز شخصیات نے طیارے کے حادثے میں ماڈلز زارا عابد اور اسرا چوہدری کے انتقال پر بھی رنج و غم کا اظہار کرتے ہوئے ان کے اہل خانہ سے اظہار تعزیت اور ان کے درجات کی بلندی کی دعا کی ہے۔