گرفتاریاں اور چھاپے حکومت کی بوکھلاہٹ کا ثبوت ہیں۔پرویز الٰہی

لاہور: اسپیکر پنجاب اسمبلی چوہدری پرویز الٰہی نے کہا ہے کہ چھاپے اور گرفتاریاں حکومت کی بوکھلاہٹ کا ثبوت ہیں۔ آئین اور قانون کے خلاف اقدامات اٹھائے جا رہے ہیں۔

تفصیلات کے مطابق اسپیکر پنجاب اسمبلی نے ڈی جی پارلیمانی امور رائے ممتاز کی گرفتاری کی مذمت کرتے ہوئے محمد خان بھٹی اور عنایت اللہ لک کے گھروں پر چھاپوں پر بھی تنقید کی۔

یہ بھی پڑھیں:

پنجاب اسمبلی اجلاس، ڈی جی پارلیمانی امور گرفتار

اپنے بیان میں اسپیکر چوہدری پرویز الٰہی نے کہا کہ یہ سارا ایکشن وزیر اعظم پاکستان شہباز شریف کے حکم پر ہو رہا ہے جبکہ گرفتاریوں اور چھاپوں سے ظاہر ہوتا ہے کہ امپورٹڈ حکومت بوکھلا گئی ہے۔

بیان میں اسپیکر چوہدری پرویز الٰہی نے رائے ممتاز کی گرفتاری کا ذمہ دار حکومت کو قرار دیتے ہوئے کہا کہ جعلی حکومت آئین اور قانون کے خلاف اقدامات اٹھا رہی ہے۔ شریفوں کا چہرہ قوم کے سامنے آرہا ہے۔

خیال رہے کہ اس سے قبل پنجاب پولیس نے مبینہ طور پر پنجاب اسمبلی کا آج ہونے والا اجلاس روکنے کیلئے ڈی جی پارلیمانی امور رائے ممتاز حسین بابر کو گرفتار کر لیا۔

 ڈی جی پارلیمانی امور رائے ممتاز حسین کو رات گئے کارروائی کرتے ہوئے گرفتار کرکے نامعلوم مقام پر منتقل کردیا گیا۔ ان کے اہلِ خانہ نے الزام عائد کیا  کہ گھر پر چھاپہ مار کارروائی وجہ بتائے بغیر کی گئی۔