اسلام آباد، قومی سلامتی کی پارلیمانی کمیٹی کا اجلاس 6 دسمبر کو طلب

اسلام آباد: اسپیکر قومی اسمبلی اسد قیصر نے قومی سلامتی کی پارلیمانی کمیٹی کا اجلاس 6 دسمبر کو طلب کیا ہے جس میں پارلیمانی جماعتوں کے مرکزی رہنماؤں کو شرکت کی دعوت دے دی گئی۔

تفصیلات کے مطابق اسپیکر قومی اسمبلی اسد قیصر کی زیر صدارت پارلیمانی کمیٹی برائے قومی سلامتی کا اجلاس 6 دسمبر کو ہوگا جس میں پی ٹی آئی، ن لیگ اور پیپلز پارٹی سمیت تمام جماعتوں کے مرکزی قائدین شریک ہوں گے۔

یہ بھی پڑھیں:

علاقائی امن کیلئے افغانستان پر عالمی اتفاق رائے پیدا کرنا ہوگا، آرمی چیف

تین ماہ انتہائی اہم، وزیر اعظم نے وزراء کو بیرون ملک جانے سے روک دیا

باوثوق ذرائع کا کہنا ہے کہ اسپیکر کی زیر صدارت پارلیمانی کمیٹی اجلاس میں وزیر اعظم کے مشیر برائے قومی سلامتی ڈاکٹر معید یوسف ملک کی سیکورٹی صورتحال پر بریفنگ دیں گے اور افغانستان سمیت دیگر اہم معاملات پر گفتگو ہوگی۔

اجلاس کے دوران افغانستان اور خطے کی سیکورٹی صورتحال کے علاوہ داخلی سلامتی کے معاملات بھی زیرغور آئیں گے۔ پی ٹی آئی حکومت  شرکائے اجلاس کو ملک کی سلامتی کی صورتحال پر اعتماد میں لے گی۔ 

خیال رہے کہ اس سے قبل وزیراعظم عمران خان نے وفاقی کابینہ کے ارکان کو موجودہ معاشی و سلامتی صورتحال کے پیشِ نظر ملک چھوڑنے سے روک دیا۔

 وفاقی کابینہ کے منگل کے اجلاس کے دوران ملک کی مجموعی اقتصادی، سلامتی اور سیاسی صورتحال پر تبادلہ خیال کیا گیا۔وزیر اعظم نے وفاقی وزراء کو حکم دیا کہ ملک نہ چھوڑیں۔