گوگل نیوز پر ہمیں فالو کریںاسلام آباد: قومی اسمبلی اور سینیٹ کے اراکین آرمی ہیڈ کوارٹرز کا دورہ آج کریں گے جس میں افغانستان کی صورتحال پر بریفنگ دی جائے گی اور آرمی چیف جنرل قمر جاوید باجوہ سے ملاقات بھی ہوگی۔
تفصیلات کے مطابق سینیٹ اور قومی اسمبلی کی قائمہ کمیٹیاں برائے دفاع آج جی ایچ کیو کا دورہ کریں گی۔ عسکری قیادت ہمسایہ ملک افغانستان کی بدلتی ہوئی صورتحال پر اراکینِ پارلیمنٹ کو بریفنگ دے گی۔
پاکستان کی دفاعی پالیسی اور ممکنہ مسائل سے نمٹنے کیلئے حکمتِ عملی پر بھی بریفنگ دی جائے گی۔ اراکینِ اسمبلی و سینیٹ سے آرمی چیف جنرل قمر جاوید باجوہ کی ملاقات اور گفتگو بھی ہوگی۔
خیال رہے کہ اِس سے قبل وزیر داخلہ شیخ رشید احمد کی جانب سے ضلع باجوڑ میں سرحد پار سے پاک فوج کی چوکی پر دہشت گردوں کی فائرنگ اور جوانوں کی شہادت کی شدید مذمت کی گئی۔
شیخ رشید نے گزشتہ روز سرحد پار فائرنگ سے سپاہی جمال اور سپاہی ایاز کی شہادت کی اطلاع پر دکھ کا اظہار کیا۔ انہوں نے وطن عزیز کی خاطر جان قربان کرنے والے پاک فوج کے جوانوں کو خراج تحسین پیش کیا۔
مزید پڑھیں: سرحد پار حملے سے پاک فوج کے جوانوں کی شہادت، وزیر داخلہ کی مذمت
گزشتہ روز طالبان نے پاکستان میں سرحد پار سے فائرنگ پر ردِ عمل دیتے ہوئے کہا کہ ہمارے لوگ پاک افغان سرحد پر باڑ سے خوش نہیں ہیں۔
پاک افغان سرحد پر فائرنگ سے 2 فوجی جوانوں کی شہادت پر پاکستان نے افغانستان کی سرزمین دہشت گردی کیلئے استعمال ہونے کی شدید مذمت کی جس پر طالبان کے ترجمان ذبیح اللہ مجاہد نے اہم بیان جاری کردیا۔
مزید پڑھیں: ہمارے لوگ باڑ سے خوش نہیں۔سرحد پار سے فائرنگ پر طالبان کا ردِ عمل
