دس سال بعد کرکٹ کی واپسی پاکستان اور سری لنکا کے درمیان پہلا ٹیسٹ کل سے شروع ہوگا

اسلام آباد: پاکستان 10 سال بعد کھیلی جانے والی ٹیسٹ سریز کا آغازکل سے ہوگا، جہاں سری لنکن ٹیم راولپنڈی میں پنڈی کرکٹ اسٹیڈیم میں پاکستانی ٹیم کے مد مقابل ہوگی جس کے بعد دوسرا ٹیسٹ میچ 19 سے 23 دسمبر تک کراچی کے نیشنل اسٹیڈیم میں ہوگا۔

شیڈول کے مطابق صبح نو بج کر پندرہ منٹ پر ٹاس ہوگا اور نو بجکر 45منٹ پر کھیل کا آغاز ہوگا ،دن کے اختتام پر روزانہ دونوں ٹیموں کے نمائندگان پریس کانفرنس میں شرکت کریں گے۔

منگل کو دونوں ٹیموں کے کھلاڑیوں نے راولپنڈی کرکٹ اسٹیڈیم میں بھرپور ٹریننگ کی اور دونوں ٹیموں کے کھلاڑی اور کپتان اور کھلاڑی میدان میں اترنے کیلئے بے تاب دکھائی دیئے ۔

بعد ازاں سیریز کی ٹرافی کی تقریب رونمائی ہوئی ، سابق کپتان جاوید میانداد اور بندولا ورنا پورا نے دونوں ممالک کی ٹیموں کے درمیان سیریز کی ٹرافی کے فوٹو شوٹ میں شرکت کی ۔

دوسری جانب راولپنڈی اور اسلام آباد میں منگل کو بھی گہرے بادل چھائے رہے اور محکمہ موسمیات کے مطابق جمعرات سے ہفتہ تک جڑواں شہروں میں بارش کا امکان ہے جس کے باعث میچ متاثر ہونے کاخدشہ ہے ۔

یاد رہے کہ پاکستان پہنچنے والی سری لنکن ٹیم میں ان کے فاسٹ باؤلر سورنگا لکمل ساتھ نہیں کیونکہ گزشتہ روز سری لنکا کے کرکٹ بورڈ نے اعلان کیا تھا کہ ڈینگی بخار کے باعث وہ ٹیم کا حصہ نہیں ہوں گے۔

سورنگا لکمل کی جگہ آسیتھا فرنینڈو کو جگہ دی گئی ہے اور وہ دوسرے میچ میں اسکواڈ کا حصہ ہوں گے اس کے علاوہ سری لنکا نے سابق کپتان دنیشن چندیمل کو بھی اپنی ٹیم میں واپسی کے راستے کے لیے ایک موقع فراہم کیا ہے تاہم ٹیم کی قیادت دیموتھ کارونارتنے کریں گے۔

مزید پڑھیں: ہوم گراؤنڈ پر کھیلنے کا موقع ملا ہے ،بھرپور فائدہ اٹھائینگے ،سری لنکن ٹیم کو آسان نہیں لینگے، اظہر علی

دوسری جانب پاکستان کی 16 رکنی ٹیسٹ ٹیم میں فواد عالم کی واپسی ہوئی ہے اور وہ اظہر علی کی قیادت میں قومی ٹیم میں کارکردگی دکھاتے نظر آئیں گے۔

پاکستان ٹیم میں اظہر علی (کپتان)، فواد عالم، محمد رضوان (وکٹ کیپر)، بابر اعظم، عابد علی، اسد شفیق، حارث سہیل، امام الحق، عمران خان، کاشف بھٹی، محمد عباس، نسیم شاہ، شاہین شاہ آفریدی، شان مسعود، یاسر شاہ اور عثمان شنواری شامل ہیں۔

جبکہ سری لنکا اسکواڈ میں دیموتھ کارونارتنے (کپتان)، اوشہادا فرنینڈو، کوسل مینڈس، انجیلو میتھیوس، دنیشن چندیمل، کوسل پریرا، لاہیرو تھریمانے، دھانن جایا ڈی سلوا، نروشن ڈکویلا، دلرووان پریرا، لستھ امبلڈینیا، لاہیرو کمارا، وشوا فرنینڈو، کاسن راجیتھا اور لکشن سنکدن جبکہ آخری ٹیسٹ کیلئے متبادل کھلاڑی آسیتھا فرنینڈو شامل ہیں ۔