گوگل نیوز پر ہمیں فالو کریںکراچی: پاکستان نے کراچی اور لاہور کی پروازوں کے لیے مخصوص فضائی راستوں کو عارضی طور پر بند کرنے کا اعلان کر دیا ہے، یہ بندش جزوی ہوگی اور اس کا اطلاق یکم مئی سے 31 مئی 2025 تک روزانہ صبح 4 بجے سے 8 بجے کے درمیان ہوگا۔
پاکستان ایئرپورٹس اتھارٹی کی جانب سے اس ضمن میں ایک نیا نوٹم یعنی نوٹس ٹو ایئر مین جاری کیا گیا ہے، جس کے مطابق لاہور اور کراچی کے فلائٹ انفارمیشن ریجنز کے بعض مخصوص حصے روزانہ چار گھنٹوں کے لیے بند رہیں گے۔
ایوی ایشن ذرائع نے تصدیق کی ہے کہ یہ فیصلہ سیکورٹی خدشات کے پیش نظر کیا گیا ہے تاہم کمرشل پروازوں کو متبادل راستوں سے چلایا جائے گا اور ایئر ٹریفک کنٹرولرز ہوائی جہازوں کو محفوظ انداز میں رہنمائی فراہم کرتے رہیں گے۔
حکام کا کہنا ہے کہ اگرچہ یہ بندش جزوی ہے لیکن پروازوں کے شیڈول پر اس کا کوئی خاص اثر نہیں پڑے گا اور فلائٹس معمول کے مطابق جاری رہیں گی۔
پاکستان انٹرنیشنل ایئر لائن نے اسلام آباد، گلگت اور سکردو کے درمیان چلنے والی چھ پروازیں منسوخ کر دی ہیں۔
