پاک بحریہ کا زمین سے فضا میں مار کرنے والے میزائلز کا کامیاب مظاہرہ

کراچی: پاک بحریہ نے زمین سے فضا میں ٹارگٹ کو نشانہ بنانے والے میزائلز کی فائرنگ کا کامیاب مظاہرہ کیا جس پر نیول چیف نے جوانوں کی حوصلہ افزائی کی۔

تفصیلات کے مطابق پاک بحریہ کے ائیر ڈیفنس یونٹ نے زمین سے فضا میں ہدف کو نشانہ بنانے والے میزائلز کو فائر کرنے کا کامیاب مظاہرہ کیا۔ تقریب میں چیف آف نیول اسٹاف ایڈمرل امجد خان نیازی بھی شریک ہوئے۔

یہ بھی پڑھیں:

پاک بحریہ نے بھارتی سب میرین کی پاکستانی حدود میں داخلے کی کوشش ناکام بنا دی

ملکی دفاع میں پاک بحریہ کی پیشہ ورانہ صلاحیتوں کا معترف ہوں، شیخ رشید

امیر البحر ایڈمرل محمد امجد خان نیازی نے میزائلز فائرنگ کا مشاہدہ کیا اور جوانوں کی حوصلہ افزائی کی۔ ترجمان پاک بحریہ کاک ہنا ہے کہ میزائلز نے اہداف کو نشانہ بنانے میں کامیابی حاصل کی جو نیوی کی آپریشنل صلاحیتوں کا ثبوت ہے۔

ترجمان پاک بحریہ کا کہنا ہے کہ پاکستان نیوی دشمن کی کسی بھی قسم کی جارحیت کا بھرپور جواب دینے کی بھرپور صلاحیت کی حامل ہے۔ فائرنگ کا شاندار مظاہرہ بحریہ کی حربی تیاریوں کا واضح ثبوت ہے۔ نیول چیف نے آپریشنل تیاریوں پر اطمینان کا اظہار کیا۔ 

خیال رہے کہ اس سے قبل  پلوامہ میں ہزیمت ناک شکست کے بعد بھارت کو ایک اور ہزیمت کا سامنا ہوا۔ پاک بحریہ نے پیشہ ورانہ مہارت کا مظاہرہ کرتے ہوئے بھارتی عزائم ناکام بنا دئیے تھے۔

پاک فوج کے شعبہ تعلقات عامہ (آئی ایس پی آر) کی جانب سے جاری ہونے والے اعلامیے میں اکتوبر کے دوران کہا گیا کہ پاک بحریہ نے بہترین پیشہ ورانہ مہارت سے بھارتی بحریہ کے عزائم کو سمندر برد کردیا۔

ترجمان پاک فوج  (انٹر سروسز پبلک ریلیشنز) کے اکتوبر کے بیان میں کہا گیا کہ پاک بحریہ نے بھارتی سب میرین کی پاکستانی حدود میں داخلے کی کوشش ناکام بنا دی۔وزارتِ داخلہ نے خبردار کیا کہ دنیا بھارت کی پاکستان مخالف جارحیت کا نوٹس لے۔