بھارت میں کورونا کے کیسز26 ہزار 496 ہوگئے، مزید 39 مریض ہلاک

نئی دہلی: بھارت میں گزشتہ 24 گھنٹوں کے دوران کورونا وائرس کے 1990 کیسزریکارڈ ہونے کے بعدتعداد26ہزار496ہوگئی ہےجبکہ 824 افراد وباء کاشکارہوکرجان گنواچکے ہیں۔

گذشتہ چوبیس گھنٹوں کے دوران بھارت کے مختلف علاقوں سے کورونا کی وجہ سے 39اموات کی اطلاع ملی ہے۔ حکومتی اعداد و شمار کے مطابق 27 اضلاع سے کوروناکے 68 فیصد کیسز رپورٹ ہوئے ہیں ۔

مہاراشٹرا ، دہلی ، گجرات ، مدھیہ پردیش ،تلنگانہ اور دیگرعلاقے کورونا سے بری طرح متاثر ہوئے ہیںجبکہ ایک ہفتے میں ملک میں کورونا کے کیسزمیں تیزی ریکارڈ کی گئی ہے۔

بھارت میں اب تک 5800 سے زیادہ کورونا وائرس کے مریض ٹھیک ہوچکے ہیں۔ آج صبح بازیابی کی شرح 21.09 فیصد رہی جو گذشتہ ہفتے 14.19 فیصد تھی۔ پچھلے 24 گھنٹوں کے دوران 741 مریض بازیاب ہوئے۔

ریاست تامل ناڈو میں چنئی سمیت پانچ شہروں میں آج ایک انتہائی سخت لاک ڈاؤن شروع ہو رہا ہے ، لاک ڈاؤن میں میں لوگوں کو گھروں سے باہر قدم رکھنے کی اجازت نہیں ہے ، جو بدھ کے روز چنئی ، مدورائی اور کوئمبٹور میں اختتام پذیر ہوگی۔

بھارت کے بدترین متاثرہ شہر ممبئی میں کورونا وائرس کے مریضوں کی تعداد5000 سے تجاوز کر گئی ہے۔ مہاراشٹرا میں کورونا وائرس کے 811 نئے کیسزرپورٹ ہوئے ۔

دہلی میں جہاں ملک کے کل کورونا وائرس کیسزکا 11 فیصد ریکارڈ کیا گیاہے ، راؤ اسپتال میں ایک نرس کو کورونا میں مبتلا ہونے کے بعد سیل کردیا  گیا ہے۔

مزید پڑھیں: برطانیہ میں مزید813افراد چل بسے، کورونا سے ہلاکتیں 20ہزار سے تجاوز

اترپردیش کے وزیر اعلی یوگی آدتیہ ناتھ نے ہفتہ کے روز کہا تھا کہ 30 جون تک ریاست ہند کے سب سے زیادہ آبادی والی ریاست میں کسی بھی اجتماع کی اجازت نہیں دی جائے گی۔

دسمبر میں چین کے ووہان شہر سے شروع ہونے والے کورونا وائرس کی وجہ سے دنیا بھر میں 2 لاکھ سے زیادہ افراد ہلاک ہوچکے ہیں۔ اب تک 28 لاکھ سے زیادہ افراد بیماری میں مبتلا ہوچکے ہیں۔