گوگل نیوز پر ہمیں فالو کریںکراچی میں گجر نالہ پر قائم تجاوزات کے خلاف آپریشن جاری ہے جس کے دوران 4 ہزار مکانات گرائے جائیں گے۔ کارروائی شروع کردی گئی۔
تفصیلات کے مطابق گجر نالہ کے دونوں جانب تجاوزات کے خلاف آپریشن کا آغاز ہوگیا۔ سینئر ڈائریکٹر محکمۂ انسدادِ تجاوزات بشیر صدیقی نے میڈیا سے گفتگو کرتے ہوئے کہا کہ ابتدائی طور پر نالے کے دونوں جانب 30 فٹ کا راستہ بنایا جارہا ہے۔
سینئر ڈائریکٹر انسدادِ تجاوزات نے کہا کہ ایک ہفتے تک سافٹ تجاوزات کا خاتمہ کیا جائے گا۔ گجر نالہ 60 فٹ سے 80 فٹ تک کلیئر کرایا جائے گا۔ نالے کے دونوں جانب 4 ہزار سے زائد مکانات اور دیگر تعمیرات گرا دی جائیں گی۔
انسدادِ تجاوزات کے مطابق تمام مکینوں کو ایک ہفتے کا نوٹس دیا گیا تھا۔ بشیر صدیقی نے کہا کہ اخبارات میں اشتہار کے ذریعے بھی مکینوں سے گھر خالی کرانے کیلئے اعلان کیا گیا۔ مکانات پر نشان لگاتے وقت بھی لوگوں کو بتایا گیا تھا۔
بشیر صدیقی نے کہا کہ سروے کے دوران متاثرین کے شناختی کارڈ کی کاپی لے لی گئی ہے۔ سندھ حکومت کی پالیسی کے مطابق متاثرین کو 2 سال کا کرایہ ادا کیا جائے گا۔ تمام ادارے سپریم کورٹ احکامات کے تابع ہیں۔ گجر نالہ ایک ماہ میں کلیئر کرانے کا تخمینہ لگایا گیا ہے۔
یہ بھی پڑھیں: گجر نالے پر تجاوزات ہٹانے کا بڑا آپریشن شروع، رینجرز طلب
