بھارت میں مسلم اقلیت کے ساتھ رواں سلوک پر تشویش ہے، اسلامی تعاون تنظیم

جدہ: اسلامی تعاون تنظیم (او آئی سی) نے بھارت میں مسلم اقلیت کے ساتھ رواں سلوک پر تشویش کا اظہار کرتے ہوئے کہا ہے کہ اقوام متحدہ کا چارٹر اور دیگر عالمی اداروں کے اصول اقلیتوں کےبلاامتیاز حقوق کی ضمانت دیتے ہیں۔

غیرملکی خبررساں ادارے کے مطابق جدہ سے جاری بیان میں او آئی سی کا کہنا تھا کہ او آئی سی کا جنرل سیکریٹریٹ بھارت میں مسلم اقلیتوں کو متاثر کرنے والے حالیہ اقدامات کاجائزہ لے رہا ہے۔

مزید پڑھیں: مقبوضہ کشمیر میں کرفیو کا 141واں روز، مظلوم کشمیریوں پر عرصۂ حیات تنگ

بھارت میں حکمران جماعت بھارتیا جنتہ پارٹی (بی جے پی) کے متنازع شہریت بل اور دیگر اقدامات پر بیان میں کہا گیا کہ شہریت کے حقوق اور بابری مسجد کیس دونوں حالیہ اقدامات پر تشویش ہے۔

او آئی سی کا اپنے بیان میں بھارتی حکومت پر زور دیتے ہوئے کہناتھا کہ بھارت میں اسلامی مقدس مقامات کے تحفظ اورمسلم اقلیت کی حفاظت کو یقینی بنایاجائے ۔

بھارت میں پیدا ہونے والی حالیہ صورت حال پر او آئی سی نے کہا کہ جنرل سیکریٹریٹ اقوام متحدہ کے چارٹر اور اس حوالے سے دیگر عالمی اداروں کی جانب سے اقلیتوں کےبلا امتیاز حقوق کی ضمانت دینے والے اصولوں کی اہمیت پر زور دیتا ہے۔

او آئی سی کا خبردار کرتے ہوئے کہنا تھا کہ اس حوالے سے اگر کوئی اقدام ان اصولوں اور معاہدوں کے برعکس کیا گیا تو مزید کشیدگی بڑھ سکتی ہے اور پورے خطے میں امن و استحکام کے حوالے سے خطرناک نتائج ہوسکتے ہیں۔