گوگل نیوز پر ہمیں فالو کریںبلوچستان میں بارش برسانے والی مغربی ہواؤں کا نیا اسپیل داخل ہونے کے بعد کوئٹہ سمیت صوبے کے مختلف علاقوں میں بارش اور برفباری شروع ہوگئی۔
بلوچستان میں منگل کوبارشوں کے نئے اسپیل کا آغاز ہوا جس کے بعد ہلکی بارش کا سلسلہ رات تک وقفے وقفے سے جاری رہا جبکہ ساتھ ہی برف باری بھی شروع ہوگئی۔ گوادر اور پنجگور سمیت صوبے کے دیگر علاقوں میں بھی ہلکی بارش ہوئی۔
محکمہ موسمیات نے آج کوئٹہ، چمن، پشین، قلعہ سیف اللہ، قلعہ عبد اللہ، زیارت، ژوب، شیرانی، موسیٰ خیل، قلات، خضدار، چاغی، پنجگور، تربت، واشک، دالبندین، خاران، گوادر، جیوانی اور پسنی سمیت کئی علاقوں میں تیز ہواؤں اور گرج چمک کے ساتھ بارش اور پہاڑوں پر برفباری کا امکان ظاہر کردیا ہے۔
یاد رہے کہ بلوچستان میں گزشتہ کئی روز سے بارش کا سلسلہ جاری ہے اور گوادر میں شدید بارشوں کی وجہ سے علاقے کو آفت زدہ قرار دیدیا گیا ہے۔ گزشتہ روز وزیراعظم شہباز شریف نے گوادر کا دورہ کرکے متاثرین سے ملاقات بھی کی تھی۔
