نو منتخب وزیر اعلیٰ پنجاب حمزہ شہباز آج بھی حلف نہ اٹھا سکے

لاہور: وزیر اعظم شہباز شریف کے صاحبزادے اور نو منتخب وزیر اعلیٰ پنجاب حمزہ شہباز آج بھی حلف نہ اٹھا سکے، گورنر پنجاب نے حمزہ شہباز سے حلف نہیں لیا، نہ ہی چیئرمین سینیٹ صادق سنجرانی دستیاب ہو پائے۔

تفصیلات کے مطابق آج بھی نو منتخب وزیر اعلیٰ پنجاب حمزہ شہباز کی تقریبِ حلف برداری التواء کا شکار رہی۔ چیئرمین سینیٹ صادق سنجرانی نے وزیر اعظم شہباز شریف سے تو حلف لے لیا، تاہم ان کے صاحبزادے سے حلف لینے کیلئے آج لاہور نہ آسکے۔

یہ بھی پڑھیں:

چوہدری سرور کا اقدام، عثمان بزدار کے استعفے کی منظوری چیلنج

چیئرمین سینیٹ صادق سنجرانی کو لاہور لانے کیلئے اسلام آباد ائیرپورٹ پر طیارہ منتظر ہی رہ گیا۔ گورنر ہاؤس میں تقریبِ حلف برداری ہونی تھی جو چیئرمین سینیٹ کی عدم موجودگی کے باعث نہ ہوسکی۔ گزشتہ روز لاہور ہائیکورٹ نے بھی معاملے کو حل کرنے کی کوشش کی تھی۔

لاہور ہائیکورٹ نے حلف برداری سے باضابطہ انکار سے متعلق تحریری آگہی دینے کیلئے مہلت دی، تاہم گورنر پنجاب نے جواب جمع نہیں کرایا۔ بعد ازاں عدالت نے صدرِ مملکت کو وزیر اعلیٰ کی حلف برداری کیلئے الگ نمائندہ مقرر کرنے کی ہدایت کی تھی۔ 

خیال رہے کہ اس سے قبل لاہور ہائیکورٹ میں وزیرا علیٰ پنجاب کی حیثیت سے سردار عثمان بزدار کے استعفے کو قبول کرنے کے سابق گورنر پنجاب چوہدری محمد سرور کے اقدام کو چیلنج کیا گیا جبکہ استعفیٰ گورنر کی بجائے سابق وزیرا عظم عمران خان کے نام تحریر کیا گیا تھا۔

درخواست گزار محمد تنویر نے 3 روز قبل  ایڈووکیٹ ندیم سرور کی وساطت سے لاہور ہائیکورٹ میں آئینی درخواست دائر کردی جس میں پنجاب حکومت، سابق وزیر اعلیٰ عثمان بزدار، چوہدری غلام سرور، گورنر عمر سرفراز چیمہ، چیئرمین پی ٹی آئی عمران خان اور نومنتخب وزیر اعلیٰ حمزہ شہباز کو فریق بنایا گیا۔