حکومت کو برطانیہ سے آٹے کے تھیلوں پر مشتمل امداد موصول نہیں ہوئی۔این ڈی ایم اے

اسلام آباد: برطانیہ سے موصول آٹے کے تھیلے بازار میں بیچنے کی سوشل میڈیا پر وائرل افواہ جھوٹی نکلی۔ این ڈی ایم اے کا کہنا ہے کہ پاکستان کو برطانیہ سے آٹے کے تھیلوں پر مشتمل کوئی امداد موصول ہی نہیں ہوئی۔

سماجی رابطے کی ویب سائٹ ٹوئٹر پر اپنے پیغام میں نیشنل ڈزاسٹر مینجمنٹ اتھارٹی (این ڈی ایم اے) نے گزشتہ روز وضاحت کی کہ سوشل میڈیا پر برطانیہ سے آئے ہوئے آٹے کے تھیلے فروخت کرنے کی خبر درست نہیں ہے۔ 

یہ بھی پڑھیں:

جاں بحق خاتون سے زیادتی کے کوئی شواہد نہیں ملے۔کراچی پولیس

Clarification:
There is no authenticity in the news circulating on SM about selling of flourbags recived from UK. As Govt of Pakistan & NDMApak has not recived any aid from United Kingdom containing/consisting of flour bags.

— NDMA PAKISTAN (@ndmapk) September 11, 2022

این ڈی ایم اے پاکستان کا کہنا ہے کہ حکومت نے برطانیہ سے آٹے کے تھیلوں پر مشتمل امداد وصول نہیں کی۔ واضح رہے کہ سوشل میڈیا پر بوری کی تصویر وائرل کرکے پراپیگنڈہ کیا جارہا تھا کہ برطانوی امداد دکانوں پر فروخت ہورہی ہے۔

بعض میڈیا رپورٹس کے مطابق برطانیہ سے سیلاب زدگان کی امداد کیلئے آئے ہوئے فرضی آٹے کے تھیلے کی تصویر میں چند گھنٹوں میں اقوامِ متحدہ کے سیکریٹری جنرل انتونیو گوتریس کو 600 سے زائد بار ٹیگ کیا گیا۔

ٹیگ کرنے کا مقصد حالیہ دنوں میں پاکستان کا 2 روزہ دورہ مکمل کرکے عالمی برادری سے سیلاب زدگان کیلئے مدد کی اپیلیں کرنے والے اقوامِ متحدہ کے سیکریٹری جنرل کو پاکستان کو امداد دینے یا اس میں مدد کرنے سے روکنا تھا۔

میڈیا رپورٹس میں دعویٰ کیا گیا ہے کہ مذکورہ تصویر 2014 کی ہے جو بھارت میں کھینچی گئی۔ برطانوی امداد پاکستان میں گزشتہ روز یعنی اتوار کو پہنچی جبکہ تصویر کو ہفتے کے روز ہی سوشل میڈیا پر وائرل کرکے جھوٹا پراپیگنڈہ کیا گیا۔