عدم اعتماد، اپوزیشن کے مطالبے پر قومی اسمبلی کا اجلاس 25مارچ کو طلب

اسلام آباد: وزیر اعظم کے خلاف تحریکِ عدم اعتماد پیش کرنے کیلئے اپوزیشن کےمطالبے پر قومی اسمبلی کا اجلاس 25 مارچ کو طلب کیا گیا ہے۔

حال ہی میں تحریکِ عدم اعتماد پر اجلاس ملتوی کرنے سے متعلق بیان دینے والے اسپیکر اسد قیصر نے قومی اسمبلی اجلاس 25 مارچ کو صبح 11 بجے طلب کیا ہے۔

یہ بھی پڑھیں:

انتظامات مکمل، وزیر اعظم مالاکنڈ میں عوامی جلسے سے خطاب آج کرینگے

اسپیکر قومی اسمبلی اسد قیصر نے اپوزیشن کی ریکوزیشن پر قومی اسمبلی کا اجلاس آئین کی شق 54 (3) اور 254 کے تحت دئیے گئے اختیارات استعمال کرتے ہوئے طلب کیا۔

قومی اسمبلی سیکرٹریٹ سے اجلاس بلانے کا باضابطہ نوٹیفکیشن جاری کردیا گیا جس کے مطابق اسمبلی کا 41واں اجلاس اپوزیشن کے مطالبے پر بلایا گیا ہے۔

خیال رہے کہ اپوزیشن نے رواں ماہ کے آغاز پر ہی وزیر اعظم کے خلاف تحریکِ عدم اعتماد جمع کرائی جبکہ اجلاس میں تاخیرپر او آئی سی کانفرنس روکنے کی دھمکیاں دی جارہی تھیں۔ 

مشترکہ اپوزیشن نے پریس کانفرنس کے دوران پیر کو قومی اسمبلی میں تحریک عدم اعتماد پیش نہ ہونے کی صورت میں ایوان میں دھرنا دینے کی دھمکی دی تھی۔

گزشتہ روز اسلام آباد میں اپوزیشن رہنماؤں کا کہنا تھا کہ عمران خان ارکان کی اکثریت کا اعتماد کھو چکے ہیں اور ان کی حکومت اخلاقی طور پر تحلیل ہو چکی ہے اور ہم جمہوریت کی بحالی کی طرف بڑھ رہے ہیں۔