قومی سلامتی کمیٹی کااجلاس یکم جولائی کو طلب، آرمی چیف بریفنگ دینگے

اسلام آباد: قومی اسمبلی کے اسپیکر اسد قیصر نے افغانستان سمیت خطے کی مجموعی صورتحال پر تبادلہ خیال کے لئے قومی سلامتی سے متعلق پارلیمانی کمیٹی کا اجلاس یکم جولائی کو طلب کرلیاہے، اجلاس میں عسکری قیادت بھی شریک ہوگی، آرمی چیف اور ڈی جی آئی ایس آئی کمیٹی کو بریفنگ دینگے۔

اسپیکر اسدقیصر نے قومی سلامتی سے متعلق پارلیمانی کمیٹی کا اجلاس یکم جولائی کو شام 3 بجے طلب کیا ہے تاکہ افغانستان سمیت خطے کی موجودہ صورتحال پر غور کیا جاسکے،ذرائع کاکہنا ہے کہ اعلیٰ فوجی قیادت اجلاس میں شریک ہوگی۔

مزید پڑھیں:ایف اے ٹی ایف کوسیاسی مقاصد کیلئے استعمال نہیں ہونا چاہیے،شاہ محمود قریشی

سینیٹ کے چیئرمین صادق سنجرانی ، قومی اسمبلی میں اپوزیشن لیڈر شہباز شریف ، پیپلز پارٹی کے چیئرمین بلاول بھٹو زرداری اور دیگر پارلیمانی رہنماؤں کو قومی سلامتی کے مسئلے میں مدعو کیا جائے گا،ان کے علاوہ قومی سلامتی کمیٹی کے ممبران ، قومی اسمبلی کے ممبران اور سینیٹرز بھی اجلاس میں شریک ہوں گے۔

قومی اسمبلی کے ذرائع نے بتایا کہ اس اجلاس سے متعلق پہلے ہی مشاورت ہوچکی ہے اور حتمی گفتگو کے بعد اجلاس طلب کرنے کے بارے میں باضابطہ نوٹیفکیشن جاری کیا جائے گا۔

وزیر خارجہ شاہ محمود قریشی، وزیر داخلہ شیخ رشید ، وزیر خزانہ شوکت ترین اور پارلیمانی امور سے متعلق وزیر اعظم کے مشیر بابر اعوان اجلاس میں شریک ہوں گے۔