فیفا ورلڈ کپ 2022 کے 12 لاکھ سے زائد ٹکٹس فروخت

فیفا ورلڈ کپ 2022 ٹھیک 5 ماہ کے بعد قطر میں کھیلا جائے گا، جس کے ٹکٹس فروخت ہونے کا سلسلہ ابھی سے شروع ہوچکا ہے۔

غیر ملکی میڈیا کی رپورٹ کے مطابق قطر میں شیڈول فٹ بال ورلڈ کپ 2022 کے 12 لاکھ سے زائد ٹکٹس فروخت ہوگئے ہیں، جس سے شائقین کی فٹ بال میں دلچسپی ظاہر ہوتی ہے۔

فٹ بال کی عالمی گورننگ باڈی فیفا کا کہنا ہے کہ ٹکٹوں کی فروخت کے تازہ ترین مرحلے میں اب تک اپریل آخر میں 2 کروڑ 35 لاکھ ٹکٹوں کی درخواستیں موصول ہوئی تھیں۔فیفا کے مطابق سب سے زیادہ درخواستیں جن ممالک سے موصول ہوئی ہیں اُن میں ارجنٹینا، برازیل، انگلینڈ، فرانس، میکسیکو، قطر، سعودی عرب اور امریکا شامل ہیں۔

واضح رہے کہ فیفا ورلڈ کپ کی ٹکٹس کی فروخت پہلے آیئے پہلے پایئے کی بنیاد پر ہوتی ہے یہی وجہ ہے کہ شائقین نے ابھی سے ٹکٹس خریدنے کیلئے درخواستیں بھیجنی شروع کردی ہیں۔

یہ بھی پڑھیں:

فیفا ورلڈ کپ 2022، کس ملک کے جیتنے کے امکانات ہیں؟

دوسری جانب میزبان قطر کو توقع ہے کہ ورلڈ کپ کے دوران 12 لاکھ سے زائد افراد ان کے ملک میں آئیں گے جو ملک کی مجموعی آبادی کا نصف ہے۔

بلومبرگ کے زیرانتظام قطر اکنامک فورم میں حسن الذوادی نے کہا کہ منتظمین قیمتوں میں ردو بدل کرنے والے مداحوں سے ٹورنامنٹ کو بچانے کے لیے کام کر رہے ہیں تاکہ مقامی کاروباری افراد کو منافع ہو اور ساتھ ورلڈ کپ مداحوں کے لیے قابل رسائی ہو۔

خیال رہے کہ قطر میں فٹ بال ورلڈ کپ رواں برس نومبر میں شروع ہوگا اور 21 نومبر کو پہلا میچ میزبان قطر ارو ایکواڈور کے سرمیان البیت اسٹیڈیم میں کھیلا جائے گا۔

ورلڈ کپ فٹ بال میں شرکت کرنے والی 32 ٹیموں کو 8 گروپس میں تقسیم کیا گیا ہے، گروپ میں شامل تمام 4 ٹیمیں آپس میں ایک،ایک میچ کھیلیں گی، 9 دسمبر کو کوارٹر فائنل مرحلے کا آغاز ہوگا جبکہ 13 اور 14 دسمبر کو دونوں سیمی فائنل کھیلے جائیں گے۔