پی ٹی آئی کارکن کی وفات کو حادثہ دکھائیں، مریم نواز کی آڈیو لیک

لاہور: پاکستان مسلم لیگ (ن) کی سینئر نائب صدر و  چیف آرگنائزر مریم نواز کی مبینہ آڈیو لیک ہوگئی جس میں کہا گیا کہ پاکستان تحریکِ انصاف کے کارکن کی وفات کو حادثہ ظاہر کرنا ہے۔

سماجی رابطے کی ویب سائٹ ٹوئٹر سمیت دیگر سوشل میڈیا پلیٹ فارمز پر لیک کی گئی مریم نواز کی مبینہ آڈیو میں کہا گیا ہے کہ یہ جو ڈیتھ ہوئی ہے پی ٹی آئی ورکر کی، اس پر کہنا چاہئے نا کہ افسوس تو مجھے بہت ہے، مگر کسی حادثے میں ان کی ڈیتھ ہوئی ہے۔

یہ بھی پڑھیں:

پی ٹی آئی کارکن کا انتقال تشدد سے نہیں ہوا، محسن  نقوی، آئی جی پنجاب

ٹوئٹر پر لیک کی گئی آڈیو کے مطابق مریم نواز نے کہا کہ میں نے یہ بھی سنا ہے کہ پی ٹی آئی کے لوگ ان کو ذاتی کار میں لائے تھے اور چھوڑ کر بھاگ گئے۔ نہیں نہیں انکل، وہ اینگل نہیں ہے۔ اینگل یہ ہے کہ وہ سارے اپنے کارکنان کو چھوڑ کر خود چھپے ہوئے ہیں۔

مریم نواز کی مبینہ آڈیو لیک ہوگئی۔ آج نگراں وزیر اعلی پنجاب محسن نقوی اور آئی جی پنجاب ڈاکٹر عثمان کی علی بلال #ظلِ_شاہ کے قتل پر پریس کانفرنس کیوں ہوئی اس آڈیو نے بھانڈہ پھوڑ دیا۔ pic.twitter.com/InmEszdzh5

— Malik Ali Raza (@MalikAliiRaza) March 11, 2023

واضح رہے کہ لیک کی گئی آڈیو میں مریم نواز مخاطب شخص کو انکل کہتی ہیں تاہم یہ واضح نہیں ہوسکا کہ انکل سے کون سا شخص مراد ہے۔تجزیہ کاروں کاکہنا ہے کہ مریم نواز تمام مسلم لیگ (ن) کے رہنماؤں میں سے پرویز رشید کو ہی انکل کہہ کر پکارتی ہیں۔

خیال رہے کہ اس سے قبل نگراں وزیر اعلیٰ پنجاب محسن نقوی اور آئی جی نے پریس کانفرنس کے دوران کہا کہ پی ٹی آئی کارکن پر تشدد نہیں ہوا بلکہ وہ ان کی موت حادثے کا نتیجہ تھی تاہم وہ جواب دینے سے قاصر رہے کہ اگر موت کی وجہ حادثہ تھی تو عمران خان کے خلاف قتل کا مقدمہ کیوں درج کیا گیا؟