گوجرانوالہ، چوری کے ثبوت مٹانے کیلئے گھر جلانے والی ملازمہ نے جرم کا اعتراف کرلیا

پنجاب کے مشہور شہر گوجرانوالہ میں چوری کے ثبوت مٹانے کیلئے گھر جلا دینے والی ملازمہ نے اپنے جرم کا اعتراف کر لیا ہے۔

تفصیلات کے مطابق عاقبت نا اندیش ملازمہ نے اپنے مالکان کے گھر چوری کرکے ثبوت مٹانے کی غرض سے گھر جلا دیا۔ پولیس نے ملزمہ کو گرفتار کر کے واقعے کی تفتیش شروع کردی۔ ملزمہ کا اعترافی بیان سامنے آگیا ہے۔

یہ بھی پڑھیں:

راولپنڈی میں مدرسے کے طالب علم سے قاری کی زیادتی، ملزم گرفتار

گوجرانوالہ پولیس کا کہنا ہے کہ کومل نامی گھریلو ملازمہ نے مالک مکان کی الماری سے 1 لاکھ سے زائد نقد رقم چوری کر لی۔ مالکان کو ملازمہ پر شک ہوا تو انہوں نے اسے پیٹا۔ مار پیٹ سے ملازمہ غصے میں آگئی اور گھر جلانے پر تل گئی۔

ملزمہ نے شک کی بنیاد پر کی گئی مارپیٹ کے اگلے ہی روز اسٹور روم میں پیٹرول چھڑک کر اسے نذرِ آتش کردیا۔ پولیس کا کہنا ہے کہ اسٹور روم کا سارا سامان جل کر راکھ ہوگیا ہے۔ واقعے کا مقدمہ درج کرکے ملزمہ کو حراست میں لے لیا گیا۔

پولیس کا کہنا ہے کہ ملزمہ نے جان بوجھ کر اپنے ہی مالکان کے گھر میں چوری کی اور پھر چوری کو پوشیدہ رکھنے کیلئے گھر میں آگ لگائی۔ ملزمہ کومل سے گرفتاری کے بعد پوچھ گچھ کی گئی جس نے دورانِ تفتیش اقرار کر لیا کہ اسی نے گھر کو آگ لگائی تھی۔