بجلی کا شارٹ فال 4500 میگا واٹ تک جاپہنچا، ملک بھر میں طویل لوڈ شیڈنگ

اسلام آباد: ملک بھر میں بجلی کا شارٹ فال 4500 میگا واٹ تک جا پہنچنے کے سبب گھنٹوں طویل لوڈ شیڈنگ شروع کردی گئی جسے اعلیٰ حکام لوڈ مینجمنٹ قرار دے دہے ہیں تاہم شہریوں کو شدید پریشانی کا سامنا ہوا۔

تفصیلات کے مطابق لاہور، اسلام آباد اور کراچی سمیت ملک کے مختلف شہروں میں طویل لوڈ شیڈنگ کا سلسلہ جاری ہے۔ جمعرات کے روز ملک بھر کے شہری و دیہی علاقوں میں طویل لوڈ شیڈنگ کا مشاہدہ کیا گیا۔ 

یہ بھی پڑھیں:

نیپرا نے بجلی 3 روپے 27 پیسے فی یونٹ مہنگی کردی

ملک کے تمام بڑے شہروں میں گھنٹوں کے حساب سے بجلی کی لوڈ شیڈنگ ہوئی۔ میڈیا رپورٹس کے مطابق دیہی علاقوں میں 12 سے 16 گھنٹوں تک طویل بجلی کی بندش ریکارڈ کی گئی۔ لاہور الیکٹرک سپلائی کمپنی کو 3100میگا واٹ بجلی فراہم کی گئی تھی۔

تاہم لیسکو کی طلب 4 ہزار 200 میگاواٹ سے زائد ہونے کے باعث بجلی کی طویل لوڈ شیڈنگ ہوئی۔ لیسکو کو زیادہ سے زیادہ 3200 میگا واٹ بجلی فراہم کی گئی جس سے بجلی کی تقسیم کار کمپنی کو تقریباً 900 میگا واٹ کے شارٹ فال کا سامنا رہا۔

حکام کا کہنا ہے کہ مختلف بجلی گھروں میں تکنیکی خرابی کے باعث بجلی کی پیداوار رک جانے سے ملک بھر میں 4500 میگا واٹ کا شارٹ فال پیدا ہوا۔ نیو کلیئر اور تھرمل پاور پلانٹس کے کام نہ کرنے کے باعث بھی شہریوں کو گھنٹوں لوڈ شیڈنگ جھیلنی پڑی۔