ملک بھر میں بجلی کی طویل لوڈ شیڈنگ جاری، عوام سراپا احتجاج

وفاقی دارالحکومت اسلام آباد، لاہور اور کراچی سمیت ملک کے مختلف شہروں میں بجلی کی طویل لوڈ شیڈنگ جاری ہے جس پر عوام سراپا احتجاج ہیں۔

تفصیلات کے مطابق لوڈ شیڈنگ کے خلاف ملک کے مختلف شہروں میں عوام سڑکوں پر نکل آئے۔ مظاہرین کا کہنا ہے کہ حکومت نے بجلی کی فی یونٹ قیمتوں میں تو اضافہ کیا ، تاہم لوڈ شیڈنگ جوں کی توں ہے۔

یہ بھی پڑھیں:

 حکومت اور اپوزیشن آمنے سامنے، بجٹ آج پیش کیا جائے گا

عوام نے حکومت سے بجلی کی بلا تعطل فراہمی کا مطالبہ کیا ہے۔ دوسری جانب ملک بھر میں بجلی کا شارٹ فال 6 ہزار 709 میگا واٹ تک جا پہنچا۔ بجلی کی مجموعی پیداوار 21 ہزار 191 میگا واٹ ہے۔

مجموعی پیداوار کے مقابلے میں ملک بھر میں بجلی کی طلب 27 ہزار 900میگا واٹ ہے۔ پانی سے 4 ہزار 528 میگا واٹ بجلی پیدا کی جارہی ہے جبکہ سرکاری تھرمل پلانٹس 1 ہزار 515 میگا واٹ تک بجلی پیدا کر رہے ہیں۔

نجی شعبے کے بجلی گھر مجموعی طور پر 12ہزار 8 میگا واٹ بجلی پیدا کر رہے ہیں۔ ونڈ پاور پلانٹس سے 1 ہزار 609 جبکہ سولر پلانٹس سے پیداوار 121 میگا واٹ ہے۔ بگاس سے 175میگاواٹ بجلی پیدا ہوتی ہے۔

جوہری ایندھن کے ذریعے چلنے والے پاور پلانٹس ملک بھر کیلئے مجموعی طور پر 1 ہزار 235 میگاواٹ بجلی پیدا کر رہے ہیں۔ ملک بھر کے مختلف شہروں میں 16 گھنٹوں تک لوڈ شیڈنگ کی جارہی ہے۔

اسلام آبادمیں بھی 6 گھنٹوں تک لوڈ شیڈنگ جاری ہے جبکہ زیادہ نقصانات والے علاقوں میں لوڈ شیڈنگ کا دورانیہ بھی زیادہ رکھا گیا ہے۔ لاہور، پشاور، کراچی اور کوئٹہ سمیت دیگر شہروں میں لوڈ شیڈنگ کا دورانیہ طویل ہے۔